Tàm hìu lơh broă Cíñ phủ, Thủ tướng Cíñ phủ ồng Phạm Minh Chính neh wă ồng Dmitry Medvedev, Củ tịc Đảng Lơgar Nga Tơrgùm dùl, Phó Củ tịc Mpồl duh broă lơngăp lơngai lơgar Nga di tàm dơ̆ tus còp mùl màl lơgar Việt Nam.

Tàm dơ̆ wă, Thủ tướng Cíñ phủ ồng Phạm Minh Chính đơs tờm lơgar Việt Nam sùm lơh jăt gùng dà broă lơh bal mờ lơgar ndai krơi is, lơh tờm, ring lơngai, git gơ̆p lơh bơyô bal, lơh broă bal mờ tơnguh bơtàu, uă bơta, uă lơgar git gơ̆p; tus bal tơrgùm mờ dunia; là bơyô, là lơgar lơh broă bal pin dờn, là lơgar tus bal niam, geh kơnòl tàm mpồl bơtiàn dunia. Bè đah să tờm, ồng Medvedev đơs tờm Đảng Lơgar Nga Tơrgùm dùl sùm kờñ bal tơnguh bơtàu bơta git gơ̆p Lơh broă bal jŏ jòng tơl ală bơta mờ lơgar Việt Nam, lơh geh sùm, tơnguh ală gah lơh broă bal ờs mờng, mờ pờ ơnàng lơh broă tàm ală gah broă lơh sa kă bro, bơcri priă, bơta niam chài, lòt nhơl, lơh broă bal mờ ală tiah, tìp bal làng bol. Bàr gah lơh pràn mờ lơh nền nòn broă lơh bal đah bàr lơgar tàm ală gah broă bè năng lượng, nhơm jờu, khoa họk-kĩ thuật, bơto bơtê mờ bơsram.