VOV4.K’ho- Drim ngai 20/05, tàm Hà Nội, Thủ tướng Cíñ phủ ồng Phạm Minh Chính wă Củ tịc Quôk hội lơgar Singapore ồng Tan Chuan- Jin gam còp ngan ngồn Việt Nam. Tàm dơ̆ wă, Thủ tướng ồng Phạm Minh Chính sồr 2 gah lơh pràn ală dơ̆ lòt còp, tìp măt kwang bàng kâp dờng mờ ală kâp tàm jơh ală gah broă lơh; lam lơh geh cồng nha ală kơrnoăt, jơnau ring bal lơh broă bal đah 2 gah, ngan là Pơrjum Ƀộ trưởng bè tàm tơrbŏ bal lơh sa Việt Nam mờ Singapore.

Thủ tướng kơ̆p kờñ Quôk hội 2 lơgar pơn jăt tai kờñ bal, ai tơl bơta ai ală broă lơh lơh broă bal bơtàu tơnguh wơl mờ bơtàu tơnguh lơh sa tơnơ̆ tơngai kòp dờng, tàm hơ̆ tơrgùm tàm ală gah broă lơh lơgar Singapore geh bơta pràn mờ Việt Nam geh jơnau kờñ, bè: tam gơl pa bơceh pa, năng lượng tơlir, lơh sa sồ, lơh uă ală anih kă bro phan gùt plai ù.

Bàr nă kwang đơng lam bồ kung neh cribơyai bè broă tàm tiah do, tàm dunia mờ ală broă 2 gah ndrờm sền gròi, tàm hơ̆ đơs sùm Asean pal kơ̆ dơn nùs nhơm bơta pal jăt bè dà lềng đah mat tơngai lik, bơsong tam pìt tam phà bơh broă lơh ring lơngai jăt tàm adat boh lam dunia, tàm hơ̆ geh Kông ươk Liên hợp quôk bè Adat dà lềng nam 1982 (UNCLOS 1982) mờ bơta kwơmàng bơh broă gàr niam ring lơngai, khăt gơboh is, lơngăp lơngai, ờdo ờdă gùng dà lềng mờ gùng rơndeh par tàm dà lềng đah măt tơngai lik.

Cau mblàng Lơ Mu K’Yến