APM Holding là tập đoàn kă bro mờ bơcri priă gùt plai ù, lơh broă tàm uă gah broă, mờ crơng gơs neh 120 nam, tập đoàn tŭ do geh măt tàm 130 lơgar mờ rơlao 100 rơbô nă cau lơh broă. Thủ tướng đơs niam bơta geh bè priă, phan lơh broă pa mờ bơta ngăc ngar atbồ gơguh jăk kung bè broă bơcri priă bơh tập đoàn APM Holding tàm lơgar Việt Nam dê, pơgồp bal tàm broă bơtàu tơnguh bơh gah gùng lòt tàm dà mờ lơh sa lơgar Việt Nam dê.

Thủ tướng pà git lơgar Việt Nam geh rơlao 3 rơbô 200 kơi sồ tiah jăt gah dà lềng, geh tàm mpồl 20 gah lơh sa geh bơta dờng kă bro mờ ală lơgar dờng ngan. Lơgar Việt Nam gam lơh pràn broă bơtàu tơnguh phan bơna gùng lòt, tàm hơ̆ geh phan bơna pơn diang phan gùng dà lềng mờ mpồl ơhò dà lềng nàng tơmù priă logistics gam kas, tơnguh bơta pràn tàm pơrlòng phan kă bro mờ lơh sa. Thủ tướng sồr tập đoàn kơlôi sơnơng, tus bal ờ uă rơndăp broă lơh mùl màl mờ lơgar Việt Nam gam hòi jà bơcri priă bè anih ơhò ơm Liên Chiểu ƀòn dờng Đà Nẵng, anih ơhò ơm ală lơgar Cần Giờ, ƀòn dờng Hồ Chí Minh, ờ uă anih ơhò ơm tàm tiah đah tô Dà lơgar, tiah tàm gùl lơgar mờ đah jum măt tơngai mŭt Dà lơgar dê.