Tàm dơ̆ tìp, Thủ tướng chờ hờp geh tìp Đại sứ di tàm tŭ Thủ tướng rơcang còp ờ uă lơgar tàm câu Âu mờ tus pơrjum kấp dờng di tơnkah 45 nam bơta git gơ̆p đah mpồl ASEAN mờ mpồl tam klăc câu Âu (EU), ai tơngŏ bơta kwơ màng tàm bơta git gơ̆p lơh broă bal đah mpồl ASEAN mờ mpồl EU.

Thủ tướng yal bè bơta lơh sa mpồl bơtiàn tàm 11 nhai bồ nam, ală cồng nha bơh dơ̆ tam gơl pa kung bè ală jơnau kờñ tơnguh bơtàu jŏ jòng mờ Pơrjum dờng Đảng gùt lơgar dơ̆ 13 neh ai, Thủ tướng đơs tờm, lơgar Việt Nam lài kung bè tơnơ̆ lơh jăt gùng dà broă lơh bal mờ lơgar ndai krơi is, lơh tờm, lơh bơyô mờ uă lơgar, lơh uă bơta git gơ̆p;  tus bal tơrgùm mờ dunia jrô ơnàng, mùl màl, geh cồng nha... Thủ tướng sồr bàr gah pơn jăt tai pơgồp bal nền nòn nàng lơh jăt geh cồng nha Hiệp địñ Kă bro khăt gơboh EVFTA mờ jơh nùs sồr ală lơgar tàm mpồl EU gam tai gờñ geh kĭ Hiệp định sền gàr dong kờl bơcri priă EVIPA; lơh pràn broă kă bro, bơcri priă gàr niam bơta kwơ ndrờm bal, rềs àr tam pà bal, cồng nha geh bal; pơn jăt tai ală broă lơh, rơndăp broă lơh bal tàm broă tơnguh bơtàu ai lơgar Việt Nam in.