VOV4.K’ho - Mho òr (02/08), Thủ tướng ồng Phạm Minh Chính wă Đại sứ lơgar Anh ồng Gareth Ward tus tơngăc di tàm dơ̆ tơn jơh tơngai lơh tàm lơgar Việt Nam. Tàm dơ̆ wă, Thủ tướng Cíñ phủ ồng Phạm Minh Chính đơs niam ală broă pơgồp bal niam bơh Đại sứ dê tàm tơngai lơh broă pa do neh pơgồp bal tàm broă ai broă lơh git gơ̆p, lơh broă bal jŏ jòng đah lơgar Việt Nam mờ lơgar Anh tơnguh bơtàu ngai sơlơ geh cồng nha, mùl màl tàm jơh ală gah broă mờ ală anih lơh broă bal mờ lơgar ndai, chồl pràn broă tìp bal làng bol.

Tàm dơ̆ tìp, bàr gah neh cri bơyai bè broă dunia mờ tàm tiah do geh sền gròi bal. Đại sứ lơgar Anh tơlik nùs nhơm kờñ bal nùs nhơm bơh mpồl ASEAN mờ lơgar Việt Nam bè broă gàr niam bơta lơngăp lơngai, ờ do ờ dă, khăt gơboh gùng rơndeh par, gùng lòt tàm dà lềng mờ bơsong broă tam phà tàm dà lềng đah măt tơngai lik mờ ală broă ring lơngai tàm tơngu me adăt boh lam dunia, tàm hơ̆ uă ngan là Hiến cương Liên Hợp Quốk mờ Kông ướk Liên Hợp Quốk bè adăt dà lềng nam 1982.

Cau mblàng Ndong Brawl