VOV4.K’ho - Tàm hìu lơh broă Cíñ phủ, Thủ tướng Cíñ phủ ồng Phạm Minh Chính wă Đại sứ lơgar Mông Cổ tus dờp kơnòl lơh broă tàm lơgar Việt Nam. Tàm dơ̆ wă, Thủ tướng Cíñ phủ ồng Phạm Minh Chính đơs tờm, bàr lơgar geh broă lơh git gơ̆p, lơh bơyô bal ờs mờng, kờñ bal, dong kờl bal tàm broă bơ̆t bơtàu mờ tơnguh bơtàu dà lơgar, tàm bơta kòp Kovid-19 gơtìp lơh gơrềng ờ niam tus mờ bơta tàm dunia bal mờ tàm tiah do, mơya broă lơh git gơ̆p đah bàr lơgar gam pơn jăt tai geh sùm khà gơguh.

                             Thủ tướng ồng Phạm Minh Chính wă Đại sứ lơgar Mông Cổ

Thủ tướng sồr bàr gah pơn jăt tai kờñ bal tàm ală pơrjum uă lơgar mờ lơgar Mông Cổ pơn jăt tai kờñ bal mờ nùs nhơm bơh mpồl ASEAN bal mờ lơgar Việt Nam dê tàm broă bơsong bơta ring lơngai ală broă tam phà, gàr niam bơta lơngăp lơngai, ờ do ờ dă gùng rơndeh par, gùng tàm dà lềng tàm tiah dà lềng đah măt tơngai lik. Đại sứ lơgar Mông Cổ ring bal uă mờ ală jơnau sồr lơh broă bal bơh Thủ tướng ồng Phạm Minh Chính dê, mờ đơs tờm geh lơh ngan pơgồp bal nền nòn mờ ală anih lơh broă lơgar Việt Nam nàng chồl pràn rơlao tai broă lơh git gơ̆p mờ lơh broă bal ờs mờng đah bàr lơgar, chồl pràn broă lơh sa, kă bro, bơcri priă, gùng lòt pơn diang phan mờ tìp bal làng bol.

Cau mblàng Ndong Brawl