VOV4.K’ho - Di tàm dơ̆ tus pơrjum dờng kwơ màng mpồl ASEAN mờ lơgar Mỹ, còp mờ lơh broă tàm lơgar Mỹ mờ Liên hợp quốk, ngai òr (12/05), Thủ tướng ồng Phạm Minh Chính neh wă ồng Scott A. Nathan, Kwang atbồ dờng Anih lơh broă Priă jền tơnguh bơtàu lơgar Mỹ (DFC).

       Thủ tướng ồng Phạm Minh Chính wă Kwang atbồ dờng Anih lơh broă priă jền tơnguh bơtàu lơgar Mỹ

Thủ tướng sồr, DFC pơn jăt tai dong kờl lơgar Việt Nam tàm ală gah bè năng lượng lơh geh wơl, sơndră mờ tam gơl trồ tiah, tam gơl sồ; tơmù hoàc huơr bơh rài tam lơh lời wơl. Thủ tướng kung sồr chồl pràn broă lơh bal tàm broă tơnguh bơtàu kơl jăp dà dờng Mekong tàm bơta dà lềng gơguh tih, tơnguh uă rài kis phan bơna mờ nùs nhơm làng bol tàm tiah do. Đơs niam bơta geh, bơta pràn lơh broă bal bè lơh sa mờ lơgar Việt Nam, ồng Scott A. Nathan pà git, geh uă rơndăp broă lơh bal đah bàr gah neh geh lơh geh uă cồng nha. Tàm tơngai tus DFC kơ̆p kờñ geh chồl pràn ală gah broă sơndră mờ tam gơl trồ tiah, năng lượng lơh geh wơl, tơnguh bơtàu tiah dà dờng Mekong.

Cau mblàng Ndong Brawl