VOV4.K’ho - Mho òr (05/08), Thủ tướng ồng Phạm Minh Chính wă ồng Roh Tae-Moon, kwang atbồ Tập đoàn Samsung điện tử lơgar Hàn Quốk gam còp, lơh broă tàm lơgar Việt Nam.

Tàm dơ̆ wă, Thủ tướng đơs tờm, Cíñ phủ lơgar Việt Nam hơ geh ai tơl ală bơta ƀuơn, tơnguh tiah niam bơcri priă ai ală mpồl lơh sa kă bro lơgar bơdìh in đơs bal mờ Tập đoàn Samsung đơs is, sền wơl nền nòn mờ bơsong niam ală jơnau bơh Tập đoàn Samsung đơs, tàm hơ̆ geh broă bơto cau lơh broă mờ tơnguh uă bơta niam cau lơh broă di pal mờ broă kờñ bơh ală mpồl lơh sa kă bro, cau bơcri priă dê. Thủ tướng kơ̆p kờñ Samsung pơn jăt tai pơgồp bal bè thể cế, kơ cế, broă lơh mờ pờ ơnàng ală broă bơcri priă, kă bro, sền lơgar Việt Nam là tiah tờm kwơ màng, jŏ jòng tàm gùt dunia tơl ală bơta rơlao tai bè lơh sa, kơlôi sơnơng, tơnguh bơtàu ală phan geh lơh tờm tus tàm drà kă bro dunia, pơgồp bal ai broă lơh git gơ̆p đah bàr lơgar tus tàm bơta pa, ngai sơlơ jrô ơnàng, mùl màl mờ geh cồng nha.

Cau mblàng Ndong Brawl