Tàm dơ̆ wă, Thủ tướng đơs tờm lơgar Việt Nam sền kwơ ngan mờ geh gùng dà lơh pràn, lơh jrô ơnàng bơta git gơ̆p Tam klăc lơh broă bal jŏ jòng đah lơgar Việt Nam mờ lơgar Italia; chờ hờp tŭ gŏ broă lơh bal đah bàr lơgar ngai sơlơ mŭt lơh ngan ngồn tàm uă broă, mờ uă cồng nha niam bơnĕ tàm ală gah broă.

Ring bal mờ ală jơnau đơs bơh ồng Attilio Fontana dê, Thủ tướng hòi jà bàr gah pơn jăt tai lơh pràn lơh sa bal, kă bro bal đah bàr lơgar tàm tơngu me ngui ală bơta ndrờm bal mờ bơtơl bal; lơgar Italia lơh pràn broă pờ mpồng drà kă bro gơwèt mờ ală phan geh lơh bơh lơgar Italia dê kờñ mờ lơgar Việt Nam geh bơta pràn bè phan tàñ mai, khŏ dum, phan geh lơh bơh suơn sre, phan tàm dà; tơnguh broă pơ gơl mpồl lơh sa kă bro, ngui niam Hiệp định EVFTA mờ kĭ Hiệp địñ Sền gàr dong kờl bơcri priă đah lơgar Việt Nam mờ Mpồl tam klăc câu Âu (EVIPA).