Tàm dơ̆ wă, Thủ tướng ồng Phạm Minh Chính đơs niam ală cồng nha kwơ màng mờ lơgar Nigeria neh lơh geh tàm broă geh kơl jăp sùm cíñ trị, tơnguh bơtàu lơh sa mpồl bơtiàn, rơcang sơndră mờ kòp Kovid-19, geh sùm gơngă là dùl tàm ală gah lơh sa dờng câu Phi dê.

Cri bơyai bè ală broă lơh mùl màl nàng lơh pràn lơh broă bal đah bàr lơgar, Thủ tướng Cíñ phủ hòi jà bàr gah pal pơgồp bal nền nòn nàng ai bơta git gơ̆p, lơh broă bal uă bơta đah bàr lơgar geh nền nòn, mùl màl mờ geh cồng nha bơh ală mpồl broă lơh bè tơnguh broă tìp bal, tam gơl mpồl nàng tơnguh jơnau git wă, pin dờn mờ tơnguh uă bơta niam lơh broă bal tàm ală gah broă bơh tơl lơgar dê geh bơta pràn bơtơl bal, tàm hơ̆ uă ngan là lơh sa. Cri bơyai bè broă tàm dunia bal mờ tàm tiah do, bàr gah đơs tờm tus mờ bơta kwơ màng bơh broă bơsong ală broă tam phà mờ ală broă lơh ring lơngai tàm tơngu me adăt boh lam dunia dê.