Tàm dơ̆ wă, bàr gah đơs là, pơrjum geh gơtha dờng ngan nàng pơn jat tai lơh jat ngan ngồn jơnau git wă bal kâp dờng, ală gùng dà ai tơlik lài sồr lơh broă rơndap lơh bơh Tổng Ƀí thư ồng Nguyễn Phú Trọng mờ Tổng Ƀí thư, Củ tịc lơgar Lo ồng Tập Cận Bình dê, ngan là Jơnau yal bơr bal đah Việt Nam mờ Lo bè broă pơn jat tai lơh niam mờ tơnguh bơta git gơp lơh broă bal jŏ jòng tơl làm, bơt bơtàu Mpồl bơtiàn tam pà tơnơ̆ do đah Việt Nam mờ Lo geh gơtha kuơmàng jat gùng dà “6 rlau”.

Thủ tướng ồng Phạm Minh Chính đơs nền, tàm uă ngan broă pal lơh nàng lơh jat ngan ngồn jơnau git wă bal kâp dờng, Jơnau yal bơr bal đah Việt Nam mờ Lo den gùng lòt là gah tam gơl pràn, gơtùi lơh ngan ngồn mờ cèng bơta pơrya, geh gơtha dờng ngan nàng tàm tơrbŏ bal jŏ jòng 2 rài lơh sa, tàm tơrbŏ bal đah tơngume “Bàr gùng lòt, dùl gùng kềng” bơh Việt Nam dê mờ jơnau bơceh lơh “Gùng kềng mờ gùng lòt” bơh Lo dê. Thủ tướng sồr tềng đap mat, bàr gah tơrgùm sơlơ sồr lơh broă bal lam lơh 3 gùng rơndeh ồs tàm tơrbŏ bal Việt Nam mờ Lo (Lào Cai - Hà Nội - Hải Phòng; Lạng Sơn - Hà Nội; Móng Cái - Hạ Long - Hải Phòng).