VOV4.K’ho- Mho ngai 13/04, tàm Hìu duh broă Cíñ phủ dê, Thủ tướng Cíñ phủ ồng Phạm Minh Chính neh wă rò Ƀộ trưởng Ƀộ Ngoại giao lơgar Canada di dơ̆ lòt còp lơgar Việt Nam. Tàm dơ̆ wă rò, Thủ tướng ồng Phạm Minh Chính geh jơnau đơs tơngŏ nùs nhơm chờ hờp tŭ bơta gĭt gơ̆p bơh 2 lơgar dê pơn jăt tai bơtàu tơnguh geh cồng nha mờ geh kwơ ngan ngồn. Ƀộ trưởng Ƀộ Ngoại giao lơgar Canada ring bal mờ ală jơnau sồr bơh Thủ tướng ồng Phạm Minh Chính dê bè ală broă lơh bơtàu tơnguh bơta gĭt gơp 2 lơgar dê tàm tơngai tus, ngan là tàm dơ̆ 2 lơgar tơngkah kir sơnrai 50 nam gĭt gơ̆p lơh broă bal tàm nam 2023.

Ƀộ trưởng Ƀộ Ngoại giao lơgar Canada pà gĭt, dơ̆ lòt còp gơ ơm tàm Broă lơh Ấn Độ Dương- Thái Bình Dương pa bơh lơgar Canada dê, jăt mờ hơ̆ Canada kơ̆p kờñ tơnguh rlau tai bơta gĭt gơ̆p mờ bàr pe lơgar tàm kơnhoàl ù tiah do, tàm hơ̆ Việt Nam là ai lài khà dùl. Bàr gah kung cribơyai bè broă Dà lềng đah mat tơngai lik, đơs sùm bơta kwơmàng bơh bơsong tam pìt tam phà dê bơh broă lơh ring lơngai jăt tàm adat boh lam dunia mờ Kông ươk Liên hợp quôk bè Adat dà lềng nam 1982 (UNCLOS); lơh jăt wil tơl DOC, wèt tus lơh gơs COC geh kwơ ngan, geh cồng nha mờ gơtùi lơh jăt ngan ngồn; gàr niam khăt gơboh is, ờdo ờdă mờ lơngăp lơngai is gùng dà lềng, gùng rơndeh par tàm dà lềng đah mat tơngai lik, jăt tàm bơta kwơ bơh jơh ală lơgar dê.

Cau mblàng Lơ Mu K’Yến