VOV4.K’ho- Mho ngai 14/02, tàm Hìu duh broă Cíñ phủ, Thủ tướng Cíñ phủ ồng Phạm Minh Chính wă rò ồng Alok Kumar Sharma, Ƀộ trưởng Cíñ phủ Anh, Củ tịc Pơrjum dơ̆ 26 ală Gah kĭ Kông ươk tơngume bơh Liên hợp quôk dê bè tam gơl trồ tiah (COP26) gam geh dơ̆ lòt còp mờ lơh broă tàm lơgar Việt Nam nàng kờñ tơnguh broă lam lơh jăt cồng nha Pơrjum.

Thủ tướng ồng Phạm Minh Chính wă rò ồng Alok Kumar Sharma

Tàm dơ̆ wă rò, Thủ tướng jờng rơ Ƀộ trưởng Cíñ phủ Anh neh rwah Việt Nam là dùl tàm ală anih tus bơh dơ̆ lòt còp câu Á dê. Pơrjum neh pờ tơlik dùl tŭ tơngai pa tàm broă lơh ngan gùt plai ù nàng kờñ tam dră wơl mờ tam gơl trồ tiah, mờ bơta ring bal dunia dê lơh broă bal nàng ai bơta tơlik nhơm ƀơ̆ lơh ƀơ̆ ƀơl tiah ơm kis ờ gam tai tàm gùl rài 21. Ồng Alok Kumar Sharma yal bè bơta sền gŏ bè bơta tam gơl uă ngan tàm Việt Nam tơnơ̆ dơ̆ lòt còp tàm nhai 05 nam lài, chờ hờp bal mờ ală cồng nha bơh Việt Nam dê tàm broă lơh rơcăng sơndră kòp. Ală cau lơh broă bal bơtàu tơnguh kung sền gŏ Việt Nam neh lơh geh cồng nha uă tàm broă lam lơh jăt broă lơh cĭt vaccine.

Cau mblàng Lơ Mu K’Yến