Tàm dơ̆ wă rò, Thủ tướng Cíñ phủ ồng Phạm Minh Chính đơs sùm, lơgar Việt Nam crăp rơcăng bal mờ lơgar Lo lam lơh geh cồng nha jơnau gĭt wă bal kwang bàng kâp dờng jăt pơlam gùng “6 rlau” neh geh Tổng Ƀí thư ồng Nguyễn Phú Trọng mờ Tổng Ƀí thư, Củ tịc lơgar Lo ồng Tập Cận Bình lơh nền bal mờ ală broă tờm là tơngguh tai ală dơ̆ lòt còp mờ tìp măt kwang bàng kâp dờng mờ ală kâp; sơlơ lơh broă bal đah ală ƀan, ƀộ, gah broă lơh, ală tiah bơh 2 lơgar dê, tàm hơ̆ lơh niam rlau lơh broă bal đah Mặt trận dà lơgar Việt Nam mờ Mặt trận dà lơgar Lo; lam lơh niam rlau tai ală broă lơh tìp măt lơh kwèng bal đah làng bol; sơlơ tam pà bal mờng chài bè broă lơh cribơyai jơnau tàm sră pơ àr, bơ̆t bơtàu Đảng mờ ătbồ dà lơgar; lơh jrô ơnàng lơh broă bal tàm ală broă ngan ngồn, ngan là bè: Lơh sa, kă bro phan, bơcri priă mờ tàm tơrbŏ bal phan bơna gùng lòt.