Tơngai lài mờ nam 2023, Lơh kơnòl broă sùm Đảng ủy, kwang đơng lam bồ Tổng kụk II neh đơng lam, sồr lơh gơs niam mờ jak ngan kơnòl broă yal jơnau tơnggit, tă pơgồp jơnau đơs bè broă rơndap lơh mờ broă lơh jòi jơnau tơnggit ndơp ndơr; di tŭ tă pơgồp jơnau đơs ai kwang đơng lam bồ Đảng, Dà lơgar, Quân ủy dà lơgar, Ƀộ Quôk phòng ai tơlik ală broă lơh nền dipal, ờ lời gơtìp rơmơp ndơl, nisơna bè broă rơndap lơh, geh kwang đơng lam bồ kâp dờng mờ ală ƀan, ƀộ, gah broă lơh, ală càr, ƀòn dờng cih dờp, jờng rơ.

Đơs mờ kwang bàng tờm ngan bơh Tổng kụk dê, Thủ tướng Phạm Minh Chính cih dờp, jờng rơ bơta lơh ngan, bơta pơn đơl pràn mờ ală pha lin, cồng nha mờ Tổng kụk II neh lơh geh tàm tơngai lài, đơs là nam 2024 mờ tơngai tus, broă tàm dunia mờ lơgar rềp bal kờp dŭ lài pơn jat tai gơlik geh kal ke, ờ gơtùi git lài, sồr gah jòi jơnau tơnggit ndơp ndơr sền gàr dà lơgar pal rơcang lài uă rlau, niam rlau, rơcang lài dờp mờ lơh gơs jak ngan tơl kơnòl broă geh Đảng, Dà lơgar jàu. Thủ tướng sồr Tổng kụk pal gàr nền nòn ală broă mờng kwèng rơcang lài tam lơh, drơng yal jơnau tơnggit, sền gàr lơngăp lơngai, gàr niam rài kis phan bơna, nùs nhơm ai cau ling in di sa tềp dà lơgar nam Giáp Thìn 2024.