VOV4.K’ho- Mang ngai 15/02, Thủ tướng Cíñ phủ ồng Phạm Minh Chính neh cribơyai tàm điện thoại mờ ồng Albert Bourla, Củ tịc mờ là Kwang atbồ đơng pơlam Tập đoàn Pfizer. Tàm dơ̆ cribơyai tàm điện thoại, Thủ tướng Cíñ phủ ồng Phạm Minh Chính ưn ngài, đơs niam Tập đoàn Pfizer mờ să tờm ồng Củ tịc Tập đoàn Pfizer tàm tơngai lài neh pơgồp bal geh cồng nha mờ ală anih lơh broă bơh Việt Nam dê nàng lơh gơs broă tac gờñ mờ tơl làm 51 tơlak ding sơnơm vaccine kòp Kovid-19 ai Việt Nam in jat jơnau sồr bơh Việt Nam dê tàm dơ̆ cribơyai tàm điện thoại mờ Thủ tướng tàm ngai 20/8 nam lài.

Thủ tướng Phạm Minh Chính pà git, pa do, Việt Nam neh blơi sơnơm vaccine bơh Pfizer dê nàng cit ai kơnòm dềt bơh 12 tus 17 sơnam in, tus tŭ do, ding dơ̆ 1 cit geh mờr 96%, ding dơ̆ 2 geh mờr 90% mờ do là bơta lơh ngan dờng ngan. Bơta do dong kơnòm dềt iang nùs mờ ờdo ờdă rlau tŭ lòt bơsram wơl. Tềng đap bơta kòp bơtờp pơn jat tai gơlik geh kal ke, nàng kờñ sền gàr pràn kơldăng să jan bơh kơnòm dềt dê mờ pơn jat tai lam lơh geh cồng nha broă pờ mpồng wơl hìu bơsram ờdo ờdă, Thủ tướng sồr Củ tịc, Kwang atbồ đơng pơlam Tập đoàn Pfizer sền gròi chul chồl sơlơ gờñ sơlơ niam broă tac 22 tơlak ding sơnơm vaccine lời ai kơnòm dềt bơh 5 tus 12 sơnam in tàm lơgar Việt Nam tàm ală ngai tus.

Cau mblàng K’Duẩn