VOV4.K’ho- Drim ngai 24/8, tàm Hìu lơh broă Cíñ phủ, Thủ tướng Phạm Minh Chính đơng lam dơ̆ pơrjum Cíñ phủ tơngume bè bơt bơtàu adat boh lam nhai 8 nam 2022 nàng sền sơ wì 4 rơndap lơh adat boh lam kuơmàng lài mờ tŭ yal, drơng pơrjum dơ̆ 4, Quôk hội khoă 15, là: Rơndap lơh Adat ù tiah (tam gơl) bơh Ƀộ Tài nguyên mờ Môi trường rơcang lài; Rơndap lơh Adat jòi cau lơh rơndap broă lơh (tam gơl) bơh Ƀộ Kế hoạc mờ Đầu tư rơcang lài; Rơndap lơh Àat Hợp tak xã (tam gơl) bơh Ƀộ Kế hoạc mờ Đầu tư rơcang lài; rơndap lơh Adat Khà priă (tam gơl) bơh Ƀộ Tài cíñ rơcang lài.

Đơs tàm dơ̆ pơrjum, Thủ tướng Phạm Minh Chính đơs nền, broă bơt bơtàu adat boh lam kuơmàng ngan, geh lơh sùm, den tàng sồr ală kwang bàng Cíñ phủ, kwang atbồ ală anih lơh broă pal lơh jat nền nòn, tơrgùm bơta pràn, dà kơl hề, bồ tơngoh jak cribơyai nền nòn. Thủ tướng kơp kờñ ală kwang bàng tơrgùm ai jơnau đơs bè broă gam geh jơnau đơs krơi is, ală tơngume pa, ală tơngume gam kòl yan tàm ngan ngồn.

Cau mblàng K’Duẩn