Tàm nùs nhơm ram mhŭ, đềt mềr, chờ hờp, đơs tàm dơ̆ tìp mat, Thủ tướng Cíñ phủ Phạm Minh Chính pà git, ngai 22/12/2023, mờr 2 tơmàn làng bol tàm gùt dunia dờp jơnau yal chờ hờp tŭ Pơrjum dờng Liên hợp quôk neh ring bal Nghị quyết dờp Sa tềp dà lơgar là ngai ơm rlô pah nam bơh Liên hợp quôk dê. Do là jơnau chờ hờp ngan ai mờr 2 tơmàn làng bol tàm dunia. Di dơ̆ do, ala mat kwang đơng lam bồ Đảng, Dà lơgar mờ làng bol Việt Nam, Thủ tướng jơh nùs ưn ngài ală Đại sứ, kwang ala mat, kwang atbồ ala mat ală mpồl lơh broă dunia bè ală nùs nhơm đềt mềr, bơta lơh broă bal geh cồng nha, bơta dong kờl kuơmàng lời ai lơgar Việt Nam in tàm nam 2023 mờ tàm jơh gùt tŭ tơngai lài.

Thủ tướng kơp kờñ mờ pin dờn ală Đại sứ, kwang ala mat, kwang atbồ ala mat ală mpồl lơh broă dunia tàm lơgar Việt Nam pơn jat tai gàr niam cồng nha gơnoar broă lơh rbàng tơrbŏ kuơmàng he dê, ai bơta git gơp lơh bơyô bal mờ lơh broă bal đah ală lơgar, ală mpồl lơh broă dunia mờ lơgar Việt Nam ngai sơlơ tam klac kơ̆ rlau, niam rlau, geh cồng nha rlau; tài dùl dunia ring lơngai, lơh bơyô bal, lơh broă bal mờ bơtàu tơnguh kơ̆ kơljap.