Bơh dùl lơgar geh khà cit sơnơm vaccine lơyah ngan, Việt Nam neh tam gơl broă gơlik geh, gơ gơs là dùl tàm 6 lơgar geh khà cit sơnơm vaccine uă ngan rlau jơh dunia. Đơs pơn dut pơrjum, Thủ tướng Phạm Minh Chính đơs nền, tus tŭ do, bol he neh gơtùi gròi sền kòp Kovid-19; ala mat Cíñ phủ, Thủ tướng ưn ngài, cih dờp mờ đơs niam bơta tă pơgồp bơh gah cribơyai broă mờ lơgar ndai dê tàm broă lơh cribơyai blơi sơnơm vaccine, tă pơgồp uă ngan tàm broă lơh rơcang sơndră kòp bơtờp.

Thủ tướng đơs loh, tơngai tus, kòp Kovid-19 kung ờ hềt jơh, broă gơlik geh gam kal ke tàm dunia. Bol he ờ gŏ di sền ờ sơp, pơn jat tai lơh ngan rơcang sơndră kòp, lơh lài broă gròi sền kòp Kovid-19 mờ ală bơta kòp bơtờp ndai. Bè hơ̆ den tàng bol he pal pơn jat tai cribơyai mờ lơgar ndai blơi sơnơm vaccine; gơtùi blơi geh sơnơm vaccine kung kơnờm broă lơh hòi jà cribơyai mờ lơgar ndai. Thủ tướng đơs loh, pal sơlơ tơnguh tàm jàu kông nghệ lơh tờm kông nghệ lơh gơlik sơnơm vaccine.