Gơl gùng rơndeh ntoat rat Ninh Bình- Nam Định- Thái Bình mờ bơta jòng kơlôi sơnơng mờr 88 kơi sồ. Rơndap broă lơh Gia Nghĩa (Dăk Nông)- Chơn Thành (Bình Phước) jòng rlau 128 kơi sồ. Bè 2 rơndap broă lơh do, Ƀộ Giao thông Vận tải đơs nền, broă ai tơlik jơnau sồr bơcri priă là pal geh ngan, sền gàr dà lơgar, sền gàr lơngăp lơngai tiah ring dà dờng Hồng, tiah đah jum mat tơngai lik dà lơgar tơrbŏ mờ tiah Tây Nguyên.

Đơs tàm pơrjum, Thủ tướng Phạm Minh Chính đơs nền, gùng rơndeh ntoat rat tơrbŏ Ninh Bình- Nam Định- Thái Bình rơp tơrbŏ Hải Phòng, Quảng Ninh lơh gơlik ù tiah bơtàu tơnguh pa mờ lơh gơlik bơnàng jă bơtàu tơnguh ai jơh gùt tiah do in; gùng tơrbŏ bơh Dăk Nông lòt Bình Phước là lơyah ngan rlau jơh là tơrbŏ tus anih ơhò ơm Vũng Tàu, là gùng kuơmàng tơrbŏ Tây Nguyên tus tiah đah jum mat tơngai lik dà lơgar lơh gơlik bơta niam bơtàu tơnguh ai jơh gùt tiah do in. Thủ tướng sồr ală kwang bàng cribơyai ai tơlik jơnau đơs nàng sền là neh lơh gơtùi bơta lơi, gam kòl yan tềng lơi, mờ kung đơs loh, pal pơn đơl pràn uă, jơnau kờñ loh làng, broă lơh loh làng mờ lam lơh jat loh làng, bơh hơ̆, ală anih lơh broă pal jơh nùs lơh bal mờ nùs nhơm ơn bơta kuơ bal lài ngan rlau jơh.