VOV4.K’ho- Drim ngai 12/9, Thủ tướng Cíñ phủ ồng Phạm Minh Chính neh đơng lam Pơrjum broă lơh rơcang sơndră, crùh ồs sa mờ sền wơl 5 nam lơh jat Nghị địñ sồ 83 bơh Cíñ phủ dê bè broă lơh dong kờl rềs àr bơh mpồl rơcang sơndră, crùh ồs sa.

                 Thủ tướng Phạm Minh Chính đơng lam pơrjum broă lơh rơcang sơndră, crùh ồs sa

Pơrjum geh bơyai lơh pờ tơlik tàm internet đah anih pờ tơlik tơn tàm Hìu lơh broă Cíñ phủ mờ 63 càr, ƀòn dờng tàm gùt lơgar. Đơs tàm pơrjum, Thủ tướng Cíñ phủ ồng Phạm Minh Chính đơs nền, tơngai lài, bơta ồs sa, bơrtoh, rềs àr gơlik geh kal ke, ờ gơtùi git lài, broă gơlik geh ngai sơlơ uă. Thủ tướng đơs sùm, ală broă gơlik geh kơn jơ̆, jê nùs là jơnau đơs lài mờ ai gŏ broă gơlik geh là jal mhar, ai tơlik jơnau sồr, kơnòl broă pa ai broă lơh rơcang sơndră in nàng gàr niam ờdo ờdă phan bơna mờ ngan là màng kis kòn bơnus. Gơ wèt mờ ală dơ̆ ồs sa dờng rềp ndo, Thủ tướng neh sồr Ƀộ Kwang àng đơng lam lùp khàu, lơh loh jơnau bơh tài gơlik geh, kơnòl bơh ală anih atbồ dà lơgar, gơnoar atbồ tàm ƀòn lơgar dê, anih lơh broă ai gơnoar, sền sơ wì mờ ală cau dùl nă să geh gơ rềng, gàr niam bơta song dơpă.

Cau mblàng K’Duẩn