VOV4.K’ho- Drim ngai 02/3, tàm hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam pơrjum pờ tơlik tàm internet gùt lơgar bè chồl mhar tơngai lam lơh rơndap ù tiah mờ tàm lùp bè gùng dà rơndap ù tiah tơrgùm jơh ală bơta dà lơgar tơngai bơh nam 2021 tus nam 2030, broă wèt sền tus nam 2050. Đơs tàm dơ̆ mut pơrjum, Thủ tướng Phạm Minh Chính đơs loh, tơnơ̆ mờr 1 nam pồ tơl Cíñ phủ pa, do là dơ̆ 2 bơyai lơh bè pơrjum chồl pràn, sền sơ wì ală rơndap ù tiah jat Adat rơndap ù tiah geh ai tơlik. Kờp bơh dơ̆ pơrjum lài tus tŭ do, Cíñ phủ neh lơh 2, 3 broă, bulah bè hơ̆, tơngai bơt bơtàu, sền sơ wì mờ ring bal rơndap ù tiah kung gam lơyài pơndrờm mờ jơnau sồr.

Jat jơnau yal tơrgùm jơh ală bơta, tus tŭ do pa bơt bơtàu geh mờr 10% rơndap ù tiah pal bơt bơtàu tàm gùt lơgar. Thủ tướng sồr tơrgùm sền sơ wì bơta geh ngan, cribơyai, ai jơnau đơs bè rơndap ù tiah jơh ală bơta dà lơgar tơngai bơh nam 2021 tus nam 2030, broă wèt sền tus nam 2050. Pơn jat tai kờp sền, sền sơ wì ală bơta kòl yan, ală broă ờ hềt gơtùi lơh, ală jơnau gơ rềng tus thể cế, geh jơnau cih halà ờ nàng cíñ phủ in pơn jat tai tam gơl, bơ tơl.

Cau mblàng K’Duẩn