VOV4.K’ho- Drim ngai 10/8, Thủ tướng Cíñ phủ ồng Phạm Minh Chính, Kwang atbồ Mpồl đơng lam dà lơgar ală broă lơh, rơndap broă kuơmàng, broă lơh tờm gah Giao thông vận tải (hòi lơyah là Mpồl đơng lam) neh đơng lam Pơrjum pờ tơlik tơn tàm internet Mpồl đơng lam. Pơrjum pơgồp bal đah broă lơh pơrjum tơn mờ pờ tơlik tàm internet đah anih pờ tơlik tơn Hìu lơh broă Cíñ phủ mờ Anih pờ tơlik tơn tàm Ủy ƀan Ñân zân 33 càr, ƀòn dờng gơ wèt dà lơgar geh ală rơndap broă, broă lơh tờm. Tàm pơrjum dơ̆ 1 bơh Mpồl đơng lam dê, Thủ tướng Phạm Minh Chính đơs nền, pal jơh nùs lam lơh jat 3 bơta tam gơl kuơmàng, tàm hơ̆ geh bơta tam gơl bè phan bơna kuơmàng, tơrgùm tàm phan bơna gùng lòt, cèng bơta tàm tơrbŏ bal ală tiah, ală càr.

Gùt anih pơrjum

Tŭ do, bè priă bơcri neh mờ gam lam lơh jơh nùs ngan tài neh tơrmù khà rơndap broă bơcri priă bơh gùt lơgar dê gơmù hơ đơm 5 rbô rơndap broă lơh, tơrgùm ai ală rơndap broă lơh dờng in mờ neh hòi jà priă bơcri dà lơgar, càr, ƀòn dờng dê, hòi jà priă bơcri di mơ tơngai, priă bơtàu tơnguh wơl mờ bơtàu tơnguh lơh sa- mpồl bơtiàn, bơnah gơguh ai priă tềm pềr tă dơ̆ ngui. Thủ tướng pà git, nàng lơh gơlik bơta pràn bơrlŭ bal, pal crơng gơs Mpồl đơng lam dà lơgar nàng đơng lam ală broă lơh bơh gơnăp gơnoar, kơnòl broă, gơnoar broă bơh Cíñ phủ, ală ƀộ, gah broă lơh, càr, ƀòn dờng dê nàng tơrbŏ wơl ală broă lơh, nàng jat sền, sồr lơh mhar, ai tơlik jơnau sồr bơsong ală kòl yan.

Cau mblàng K’Duẩn