VOV4.K’ho- Drim ngai 07/8, Thủ tướng Cíñ phủ ồng Phạm Minh Chính lơh broă mờ kwang đơng lam bồ ală ƀộ, gah broă lơh dà lơgar, mpồl tờm bơcri priă lam lơh mờ ƀòn dờng Hà Nội nàng tă bơsong ală kal ke, kòl yan, tơnguh mhar tơngai lam lơh Gơl gùng rơndeh ồs tiah drà lơh tơrlòng lài, gơl Nhổn- anih rơndeh ồs ơm Hà Nội. Tơnơ̆ tŭ lòt sền rơndap broă lơh, Thủ tướng Cíñ phủ ồng Phạm Minh Chính neh geh dơ̆ lơh broă tơn mờ ƀòn dờng Hà Nội, ală ƀộ, gah broă lơh dà lơgar geh gơ rềng, cau tờm bơcri priă lơh bơh rơndap broă lơh gơl gùng rơndeh ồs tiah drà tơrlòng lài gơl Nhổn- anih rơndeh ồs ơm Hà Nội nàng kờñ tă bơsong kòl yan, kal ke gơ rềng tus rơndap broă lơh.

Đơs pơn dut dơ̆ pơrjum, Thủ tướng Phạm Minh Chính đơs loh, jơnau bơh tài gơlik geh mờ kơnòl lơh rơndap broă lơyài tơngai lam lơh, gơguh priă bơcri gơ wèt hờ cau tờm bơcri priă, ƀòn dờng Hà Nội, ală mpồl pơlam lơh broă, ală cau tờm lơh; bơta pơgồp bal đah ală ƀộ, gah broă lơh dà lơgar mờ ƀòn dờng Hà Nội ờ hềt jơh nùs, ờ hềt geh cồng nha. Thủ tướng sồr ală ƀộ, gah broă lơh, anih lơh broă mờ ƀòn dờng Hà Nội pal rơcang lài, jơh nùs lam lơh ală kơnòl broă, broă lơh neh geh ring bal, pleh ờ loh làng, tàm tuh kơnòl, dilah geh kòl yan den anih tờm lơh pal hòi ală anih lơh broă geh gơ rềng nàng bơsong jat di kơrnuat lơh broă bơh Cíñ phủ dê.

Cau mblàng K’Duẩn