Dơ̆ lòt còp bơh Thủ tướng Cíñ phủ Phạm Minh Chính dê tus Romania dơ̆ do là broă lơh cribơyai mpồl kwang bàng sơn rờp tàm kâp Thủ tướng Cíñ phủ đah 2 lơgar tơnơ̆ 5 nam. Tàm dơ̆ lòt còp, Thủ tướng Cíñ phủ Phạm Minh Chính geh ală dơ̆ pơrjum, tìp mat mờ Thủ tướng, Kwang atbồ lơgar, Củ tịc Thượng viện, Củ tịc hạ viện lơgar Romania. Bal mờ hơ̆, Thủ tướng rơp còp kâp hơ đơm, hìu bơsram đại họk, tus bal Cribơyai mpồl lơh sa kă bro Việt Nam – Romania; wă ala mat Mpồl lơh bơyô bal Romania – Việt Nam mờ tìp mat kwang bàng, cau lơh broă Đại sứ quán mờ ala mat mpồl bơtiàn cau Việt Nam tàm Romania. Dơ̆ lòt còp nàng kờñ lơh niam rlau tai bơta git gơp lơh bơyô ờs mờng mờ lơh broă bal uă gah đah Việt Nam mờ Romania, lơh gơlik bơta gơn kơnờm sơlơ tơnguh tai lơh broă bal 2 gah tàm ală gah broă geh bơta pràn bơh Romania dê mờ dipal mờ jơnau kờñ bơtàu tơnguh bơh lơgar Việt Nam dê.

Drim ngai 21/01, (jat jiơ tiah do dê), Thủ tướng Cíñ phủ Phạm Minh Chính neh lòt còp Viện Kơlôi sơnơng mờ Bơtàu tơnguh Tin họk Dà lơgar Romania (ICI). Tơngŏ bơta chờ hờp mờ gờm chờ Thủ tướng Cíñ phủ Phạm Minh Chính- kwang đơng lam bồ Viện Kơlôi sơnơng mờ bơtàu tơnguh tin họk dà lơgar Romania (ICI) pà gĭt, ICI geh gơnoar broă kwơ màng tàm broă bơto bơtê mpồl lơh broă kông nghệ thông tin; neh tă pơgồp bơta gơn kơnờm ai bơta gơguh jak, bơtàu tơnguh bơh lơgar Romania dê. Ală rơndăp broă lơh kơlôi sơnơng mờ ngui kông nghệ bơh ICI dê ờ mìng cèng wơl ală broă lơh gơguh jak lơm mờ gam tă pơgồp tàm broă lơh lơh geh ngan ngồn ală mpồl cau lơh broă mờ bơtàu tơnguh bơta niam rài kis dê.

Đơs tàm do, Thủ tướng Cíñ phủ Phạm Minh Chính pà gĭt, lơgar Việt Nam neh bơt bơtàu mờ lam lơh broă lơh kwơ màng tam gơl sồ Dà lơgar; broă lơh kwơ màng Dà lơgar bè kơlôi sơnơng, bơtàu tơnguh mờ ngui bồ tơngoh kòn bơnus lơh gơlik; tơlik mat Anih tờm Tam gơl pa bơceh lơh Dà lơgar...; sồr Viện ICI Romania ơn lơgar Việt Nam là dùl lơgar lơh broă lài ngan tàm broă lơh rề ơnàng lơh broă bal dunia, dong lơgar Việt Nam bơto bơtê mpồl lơh broă jak tàm gah broă do. Lài hơ̆, Thủ tướng Phạm Minh Chính neh còp Cơldŭ lơh broă Kă bro mờ Lơh sa mờ măi mok càr Prahova mờ tìp mat mờ kwang bàng, cau lơh broă Đại sứ quán, mpồl bơtiàn cau Việt Nam kis tàm lơgar Romania.