VOV4.K’ho- Tàm dơ̆ Pơrjum kwang bàng kâp dờng kuơmàng mpồl ASEAN mờ lơgar Mỹ tàm càr lơgar Washington, lơgar Mỹ, mang ngai 12/5, Thủ tướng Cíñ phủ Phạm Minh Chính neh geh dơ̆ tìp mat mờ Kwang atbồ lơgar Mỹ ồng Joe Biden tàm Hìu Kò. Tàm dơ̆ tìp mat, Thủ tướng Cíñ phủ Phạm Minh Chính mờ Kwang atbồ lơgar Mỹ ồng Joe Biden neh cribơyai bè git gơp 2 lơgar đah Việt Nam mờ Mỹ mờ ală broă tàm tiah do mờ tàm dunia.

Thủ tướng Phạm Minh Chính mờ Kwang atbồ lơgar Mỹ ồng Joe Biden

Thủ tướng Phạm Minh Chính đơs, git gơp đah Việt Nam mờ Mỹ là dùl git gơp kuơmàng. 2 lơgar neh lòt gan tŭ tơngai rài yau jê sồt bơh rài tam lơh dê, bal mờ gơp lơh broă bal, chồl pràn git gơp lơh broă bal tơl làm bơtàu tơnguh ngai sơlơ ngan ngồn, geh cồng nha tàm tơl gah broă lơh. Việt Nam kơp kờñ Mỹ pơn jat tai dong kờl mờ lơh broă bal mờ Việt Nam tàm ală gah mờ Mỹ geh bơta pràn mờ Việt Nam gam geh jơnau kờñ bè rơcang sơndră kòp bơtờp, tam gơl sồ, lơh li la ròt mpồl lơh gơlik mờ tac phan, rơcang sơndră tam gơl trồ tiah, bơto bơtê cau lơh broă.

Cau mblàng K’Duẩn