Cribơyai geh lơh tàm Đại họk RMIT, ƀòn dờng Melbourne, ƀang Victoria, bơh Ƀộ Kế hoặc mờ Đầu tư mờ Đại sứ quán lơgar Việt Nam tàm lơgar Australia pơgồp bal mờ Anih lơh broă Kă bro mờ Bơcri priă lơgar Australia, Đại sứ quán lơgar Australia tàm lơgar Việt Nam bơyai lơh bal mờ bơta tus bal bơh rơ̆ ru ngan ală mpồl lơh sa kă bro 2 lơgar dê. Tàm do, ală cau ala măt geh yal tơngĭt bè jơnau tơl pràn, tiah bơcri priă, kă bro bơh lơgar Việt Nam mờ Australia dê; iăt yal tơngĭt bè jơnau tơl pràn mờ broă rơndăp lơh bơcri priă, kă bro bơh ală mpồl lơh sa kă bro 2 lơgar dê. Sền swì jơnau tơl pràn bơtàu tơnguh bơh drà priă jền tàm Việt Nam; Sền swì bè lơh broă bal bơcri priă tàm gah lơh broă sa sươn sre măy mok pa bơh mpồl lơh sa kă bro lơgar Việt Nam dê tàm Australia. Kwơmàng, Cribơyai neh lời tŭ jiơ nàng ală mpồl lơh sa kă bro in geh ală jơnau lùp mờ geh kwang đơng lam bồ ală ƀộ, gah lơh broă bơh 2 gah dê mblàng hơ ală broă sền gròi, bè: Broă rơndăp lơh bơtàu tơnguh lơh sa bơh tơl lơgar dê; ală gah broă ai lài; adăt boh lam broă dong kờl; sră nggal, phan bơna, mpồl cau lơh broă...Bal mờ hơ̆, mpồl lơh sa kă bro 2 gah kung cribơyai, lơh kwèng bal nàng lơh broă bal bơcri priă, kă bro.

Đơs tàm dơ̆ cribơyai, Thủ tướng Phạm Minh Chính sồr tàm tŭ lơh broă bal, 2 gah tơrgùm chồl tơnguh ală bơta gơn kơnờm gơguh tai bơh lài bè bơcri priă, tăc phan mờ lơgar ndai, ngui sa, tam gơl sồ, tam gơl tơlir. Cau lam bồ Cíñ phủ kung kơ̆p kờñ 2 gah pơn jăt tai lơh pràn lơh broă bal tìp măt lơh kwèng bal đah làng bol, lòt nhơl, niam chài mờ bơto bơtê jăt tàm ngui niam pràn kơldang rài kis niam chài krơi is mờ li la bơh 2 jơi bơtiàn dê.