Mang ngai 01/02, tàm Hà Nội, Thủ tướng Phạm Minh Chính tus bal dơ̆ bơyai lơh jàu Khà jờng sră ƀăo Mŭt mơ̆ rơmĭt dơ̆ VIII nam 2023. Geh 72 jơnau cih jak ngan geh Mpồl Bơyai lơh săc rwah mờ jàu khà jờng là ala măt jak ngan ai 2.216 jơnau cih bơtòm tơrgùm, lơh gơs bơta jơh nùs lơh ngan, bồ tơngoh jak, bơta ngăc ngar mờ tơngŏ bơta jòi sền, lơh broă bơceh lơh bal mờ bồ tơngoh kơlôi sơnơng cíñ trị ngăc ngar àng sơrdah, nùs nhơm gah broă lơh mờ kơnòl mpồl bơtiàn, mờ nùs nhơm kờñ gơboh ƀòn lơgar, dà lơgar dờng ngan rlau jơh bơh ală cau lơh ƀăo dê.

Đơs tàm dơ̆ bơyai lơh, Thủ tướng Cíñ phủ Phạm Minh Chính nting bơr gờm chờ bơta lơh geh cồng nha bơh Khà jờng sră ƀăo Mŭt mơ̆ rơmĭt dơ̆ VIII nam 2023 dê mờ jờng rơ ală cau dồ nă să, mpồl cau neh tus bal mờ lơh geh Khà jờng nam do. Bal mờ jơnau đơs “ai bơta niam tơnroh bơta iơh”, “ai bơta jơh nùs lơh tơnroh bơta ờ niam”, Thủ tướng sồr ală kâp ủy, mpồl đảng tơrgùm đơng lam, sồr lơh, ai tơl ală bơta ai ală anih lơh sră ƀăo, mpồl cau cih ƀăo in tơrgùm mblàng yal, cih yal wơl ală bơta kwơ cribơyai jơnau tàm sră pơ àr, nùs nhơm tam gơl pa bơh Đảng dê mờ bơta lơh ngan jơh nùs bơ̆t bơtàu Đảng sàng goh, pràn kơldang kơ̆ kơl jăp. Sơlơ tơnguh rlau tai ală jơnau cih bè ală cau pơnrơ gơguh jak, krơh cau niam, broă niam, cau dồ să is pơnrơ jak.