Đơs tàm dơ̆ bơyai lơh, đơs nền gơnoar broă dờng màng bơh pơndiang phan gùng rơndeh par dê tàm bơtàu tơnguh lơh sa tŭ do, Thủ tướng Phạm Minh Chính đơs là, ring lơngai mờ lơh broă bal kung gam là gùng dà tờm ngan, den tàng lơh sa, kă bro mờ bơcri priă rơp pơn jat tai bơtàu tơnguh; tŭ lơh sa bơtàu tơnguh den jơnau kờñ ngui sa, lòt rê, lòt nhơl bơh làng bol dê rơp uă rlau. 

Tàm tŭ tơngai bè hơ̆, tìp mat lơh kwèng kòn bơnus geh gơnoar broă dờng màng ngan mờ jơnau kờñ lòt rê mờ gùng rơndeh par rơp gơguh uă. Thủ tướng Phạm Minh Chính kơp kờñ ală gah rơndeh par bơh Việt Nam dê lơh broă bal, tàm pơrlòng ring bal, ngan là tàm tŭ tơngai tŭ do – tŭ 2 lơgar rơp tơnguh gơs bơta git gơp lơh broă bal jŏ jòng tơl làm, tàm hơ̆ geh gah lơh broă bal bơto bơtê cau lơh broă geh gơnoar broă kuơmàng ngan.