Pơrjum geh tàm tơrbŏ pờ tơlik tơn tàm internet tus 63 càr, ƀòn dờng tàm gùt lơgar. Đơs tàm pơrjum, Thủ tướng ồng Phạm Minh Chính sồr, tơngai tus, Ƀộ Kế hoạc mờ Đầu tư pal lơh niam kơnòl broă he dê, ngui niam ngan rlau jơh gơnoar broă là anih tờm ai tơlik jơnau đơs bơh Đảng, Dà lơgar, Cíñ phủ dê, pơn jat tai pơn đơl pràn rlau tai tàm broă lơh đơng pơlam broă rơndap lơh mờ đơng pơlam lơh sa dờng, jat sền nền nòn broă gơlik geh tàm ală lơgar rềp bal mờ tàm dunia; git loh tŭ niam, bơta lòng; sơlơ tơnguh broă lơh đơs lài, tơngkah lài, bơt bơtàu jơnau rơcang lài nàng di tŭ ai tơlik broă rơndap lơh mờ Cíñ phủ, Thủ tướng Cíñ phủ in ală broă lơh tàm broă đơng lam, pơlam mờ lam lơh jat ală Nghị quyết bơh Đảng, Quôk hội mờ Cíñ phủ dê.

Bơdìh hơ̆ tai, Thủ tướng sồr, Ƀộ Kế hoạc mờ Đầu tư pal sơlơ tơnguh tam gơl sồ dà lơgar tàm jơh ală gah gam atbồ; sơlơ tơnguh tam gơl wơl hàñ cíñ, sơlơ tơnguh bơta loh làng, song dơpă.