Nam lài, gah lơh sa suơn sre neh lơh geh uă cồng nha kuơmàng ngan. Broă lơh sa suơn sre jơh bal lơh sa suơn sre, brê bơnơm, phan tàm dà kung gam gàr sùm kơ̆ kơljap. Tàm hơ̆ lơh sa suơn sre gơguh 3,36% pơndrờm mờ bal dùl tŭ nam 2021; tac hờ lơgar ndai geh mờr 7 tơlak tấn phe mờ uă bơta phan lơh gơs bơh suơn sre tờm ngan ndai mờ kờp jơh priă lơh geh rlau 53 tơmàn dolar Mỹ.

Đơs tàm pơrjum, Thủ tướng sồr, nam 2023, Ƀộ Nông nghiệp mờ Phát triển Nông thôn mờ jơh gùt gah lơh sa suơn sre, ƀòn lơgar pal pin dờn, pràn kơldang, rơ wah ală kơnòl broă, broă lơh tam gơl pràn. Tàm hơ̆, pal chồl pràn broă ngui măi mok, tam gơl sồ mờ ngui khoa họk kông nghệ, kông nghệ kao, ngac ngar tàm broă lơh sa suơn sre; bơtàu tơnguh lơh sa suơn sre hữu kơ, lơh sa suơn sre sàng goh; bơtàu tơnguh lơh sa mờ măi mok drơng lơh sa suơn sre; măi mok lơh gơlik phan; bơtàu tơnguh ală mpồl lơh bal pơgồp bal mờ tiah tam phan, ală broă lơh lơh bal lơh sa, lơh gơlik phan tàm tơrbŏ bal mờ mpồl tac phan tàm lơgar mờ dunia.