VOV4.K’ho- Mho ngai 05/4, tàm hìu lơh broă Cíñ phủ, Thủ tướng Cíñ phủ ồng Phạm Minh Chính wă Ƀộ trưởng Ngoại giao Panama ồng Érika Mouynes tus lùp còp di dơ̆ lòt còp ngan ngồn lơgar Việt Nam bơh ngai 04 tus ngai 06/4. Bè git gơp 2 lơgar, Thủ tướng Cíñ phủ kơp kờñ 2 lơgar pơn jat tai pơgồp bal jơh nùs, geh cồng nha nàng Panama gơ gơs là rbàng tơrbŏ pơgồp bơnah ai phan Việt Nam mut tàm drà kă bro Mỹ Latinh, mờ sơ lơ̆u wơl, Việt Nam là lơgar nàng phan bơna Panama dê mut tàm drà kă bro Đông Nam Á.

Nàng git gơp 2 lơgar ngai sơlơ geh cồng nha mờ ngan ngồn rlau tai, Thủ tướng Phạm Minh Chính sồr Ƀộ Ngoại giao mờ ală Ƀộ, gah broă lơh 2 lơgar sơlơ tơnguh rlau tai broă tàm pơ gơl mpồl kwang bàng ală kâp, tìp mat kềng bơdìh ală pơrjum dunia, tơnguh cồng nha kơ cế sền git cíñ trị kâp Thứ trưởng Ngoại giao mờ Ủy ƀan bal bè lơh broă bal lơh sa, kă bro mờ bơcri priă Việt Nam – Panama, chồl pràn lơh broă bal tàm ală gah mờ 2 lơgar geh uă bơta pràn mờ bơta ƀuơn bè kă bro, pơndiang phan gùng dà lềng.

Cau mblàng K’Duẩn