VOV4.K’ho- Mho ngai 02/03, tàm hìu duh broă Cíñ phủ, Thủ tướng Cíñ phủ ồng Phạm Minh Chính, Kwang ătbồ Ủy ƀan dà lơgar bè tam gơl sồ drơng pơrjum bè cồng nha bơh sơnrờp mờ ală kơnòl broă, broă lơh dong lam lơh jăt Rơndăp broă lơh bơtàu tơnguh ngui khà sồ làng bol ơm kis, sơnđan mat mờ tŏp ƀang kị điện tử drơng tam gơl sồ dà lơgar tơngai bơh nam 2022- 2025, wèt sền tus nam 2030 (Hòi lơyah là Rơndăp broă lơh 06).

Pơndŭt dơ̆ pơrjum, Thủ tướng Cíñ phủ ồng Phạm Minh Cíñ đơs nền: Broă lơh jăt Rơndăp broă lơh 06 là dùl bơnah lơh jăt bơtàu tơnguh pràn bè phan bơna geh Pơrjum dờng dơ̆ XIII bơh Đảng dê gĭt nền; pơgồp bơnah tam gơl sồ, bơ̆t bơtàu Cíñ phủ sồ, mpồl bơtiàn sồ, làng bol sồ. Bè kơnòl tờm tàm tơngai tus, Thủ tướng Cíñ phủ sồr ală ƀộ, gah sơnah lơh broă dà lơgar, Ủy ƀan Ñân zân ală càr mờ ƀòn dờng mhar lam lơh jăt Rơndăp broă lơh, tàm hơ̆ pal lam lơh jăt wil tơl ală tơngume, jàu kơnòl loh làng nàng lam lơh jăt di tơngai pơrgon ală kơnòl broă geh jàu. Lơh mhar tŭ tơngai lơh mờ lơh sir ală sră nggal kơrnoăt boh lam geh gơrềng tus lơh jăt ală tơngume bơh Rơndăp broă lơh dê.

Cau mblàng Lơ Mu K’Yến