VOV4.K’ho- Mho ngai 10/10, Thủ tướng Cíñ phủ pa geh sră nggal pơyoa Củ tịc Ủy ƀan Ñân zân càr, ƀòn dờng tiah tàm gùl lơgar in; ală Ƀộ, ƀan, ngàñ geh gơrềng, ală anih lơh broă yal tơngĭt jơnau sră băo dà lơgar, ală tiah, Mpồl đơng lam dà lơgar bè rcang sơndră trồ tiah lơh aniai mờ Ủy ƀan dà lơgar rcang sơndră bơta aniai, trồ tiah lơh aniai mờ lòt jòi dong kờl cau gơbàn rềs àr bè rcang sơndră trồ tiah lơh aniai.

Mìu dờng lơh dà tih ngơr bam dà tàm Phú Yên

Tàm sră nggal đơs loh: tài gơrềng bơh nhơm mrềt, tàm tiah tàm gùl lơgar digơlan kung gam pơn jat tai gơlik geh mìu dờng tàm tơngai tus, bơta pơhìn uă ngan gơlik geh dà tih dà kŏ dà cò, ngơr bam jrô tàm uă tiah tàm tiah thiòng, tơrlah ù, dà kŏ dà cò tàm tiah kơh bơnơm tam cah is gùng lòt, gơrềng tus broă lơh sa, rài kis bơh làng bol dê. Thủ tướng Cíñ phủ sồr Ủy ƀan Ñân zân ală càr, ƀòn dờng tàm tiah tàm gùl lơgar lam lơh jat sền niam bơta gơlik geh bơh mìu dờng dà kŏ dà cò, kờp sền rcang lài ntrờñ làng bol lik bơh ală tiah ngòt rơngơ̆t, tiah gơtìp ngơr jrô, dà jơñhăng, ƀañ lời gơlik geh bơta hoàc huơr pơlai soh lơi bè kòn bơnus, mblàng yal, hòi jà, bơto pơlam làng bol lơh jat ală broă lơh gàr niam bơta lơngap lơngai, tơrmù ƀà bơta hoàc huơr tŭ mìu dờng dà tih, ngơr bam dà, dà kŏ dà cò; rcang gàr niam kòi phe, phan ngui phan sa, phan ngui sa kờñ pal geh ai làng bol tàm ală tiah geh bơta pơhìn dà wềl tam cah is tài bơh dà ngơr jrô, tơrlah ù, rcang lam lơh broă dong kờl ai ală hìu bơnhă làng bol geh bơta pơhìn gơtìp gloh.

VOV Tây Nguyên- Cau mblàng K’Hạnh