Yal tàm dơ̆ lơh broă pà gŏ, 4 nhai bồ nam 2023 kờp jơh tơm priă dia tàm ù tiah ƀòn dờng dê là mờr 178 rơbô tơmàn đong, lơh geh rlau 50% jơnau kờp dŭ lài, gơguh 21,6% pơndrờm dùl tŭ bal mờ nam lài. Hà Nội ơm dơ̆ 2 gùt lơgar bè gơ hòi gơ jà FDI mờ rlau 7 rơbô rơndap broă lơh gam geh mut lơh mờ priă bơcri lơh 61 tơmàn 700 tơlak dolar Mỹ.

Đơs tàm dơ̆ lơh broă, Thủ tướng Cíñ phủ ồng Phạm Minh Chính sồr tàm tơngai tus, ƀòn dờng pơn jat tai bơsram, mut lơh ngan ngồn Nghị quyết pơrjum dờng dơ̆ XIII bơh Đảng dê, lam lơh jat ală Nghị quyết, jơnau đơs pơndŭt bơh Ƀộ Cíñ trị dê bè bơtàu tơnguh Tiah ring dà dờng Hồng, càr lơgar Hà Nội. Lơh jat pràn kơl dang nùs nhơm pơn đơl pràn lơh ngan, lơh is, bơhiàn tam klăc bal, ngăc ngar, bơceh lơh, hòi jà geh cồng nha tơl bơta priă jền. Lơh ờ geh gơ gơs geh, lơh kal ke gơ gơs ƀuơn, lơh bơta ờ gơtùi gơ gơs bơta lơh gơtùi; ngui jơh cồng nha tơl bơta ƀuơn, bơta pràn krơi is, bơta ƀuơn tàm pơndrờm bal, tŭ tơngai mpờl gŏ, brồ guh pràn kơl dang mờ bơta pràn geh lài tàm dơlam is dê.