Yal mờ Thủ tướng Cíñ phủ mờ Mpồl lơh broă, Củ tịc Ủy ƀan Ñân zân càr Lâm Đồng ồng Trần Văn Hiệp pà gĭt, nam 2022 bulah gam geh uă bơta kal ke, bơta lòng, mơya Đảng ƀộ, gơnoar atbồ mờ làng bol càr Lâm Đồng neh tam klăc bal, jơh nùs lơh ngan, pơn đơl pràn lơh ngan uă mờ lơh geh ală cồng nha niam ngan, tơl làm đau tàm ală gah, kờp dŭ lài geh lơh geh mờ sơr lèt jơh 18 broă jàu bơtàu tơnguh lơh sa- mpồl bơtiàn nam 2022 dê, tàm hơ̆ sơr lèt 6 broă jàu.

Càr Lâm Đồng dan mờ Cíñ phủ, Thủ tướng Cíñ phủ, ală Ƀộ, ngàñ Dà lơgar bàr pe tơngume geh gơrềng tus broă bơt bơtàu phan bơna bè: dong kờl càr lơh gùng rơndeh ntoăt răt Bảo Lộc - Liêng Khàng; gờñ lam lơh rơndap broă lơh gùng rơndeh ntoăt răt Nha Trang- Liêng Khàng, Liêng Khàng - Buôn Ma Thuột mờ lài ngan lơh bàr pe gơl gùng lòt geh bơta tàm tơrbŏ bal mờ  tiah ndai.

Tơnơ̆ tŭ iăt ală jơnau đơs, đơs pơndŭt tàm dơ̆ lơh broă, Thủ tướng Cíñ phủ ồng Phạm Minh Chính gờm chờ, jờng rơ Đảng ƀộ, gơnoar atbồ, làng bol mờ mpồl lơh sa kă bro càr Lâm Đồng dê neh lơh geh tàm ală nam do, ngan là tàm nam 2022 lơh sa - mpồl bơtiàn bơtàu tơnguh mhar. Tàm tơngai tus Thủ tướng sồr càr Lâm Đồng sơlơ tam gơl pa broă lơh gơguh lơh sa jat gùng dà jat tàm bơta tam gơl pa bơceh pa, tơnguh cồng nha lơh geh, ngui khoa họk kông nghệ pa, ngan là ală gah broă geh bơta ƀuơn, bơta pràn bè nhơl chờ, drơng broă ala, logistic, lơh sa suơn sre... pơnđơl pràn lơh ngan gơ gơs là bơta gơn kơnờm gơguh lơh sa bơh tiah Tây Nguyên mờ jơh gùt lơgar dê.

Lài hơ̆, Thủ tướng Cíñ phủ ồng Phạm Minh Chính mờ Mpồl kwang bàng bơh Cíñ phủ dê neh còp Kông ty TNHH Dalat Harfarm mờng lơh gơlik, tac cồng sơntìl, bơkàu koh ntê mờ bơkàu tam tàm khàp tàm ƀòn dờng Dà Làc. Tơnơ̆ mờr 30 nam crơng gơs, bơh 1 lồ bơkàu hồng mờ 1 lồ kẩm cướng geh tam tàm ală hìu krơh lơh mờ gle bơh sơn rờp; tŭ do Dalat Hasfarm neh tam gơl lơh hìu krơh mờ lòs mờ lơh tai ală anih suơn dờng mờr 320 lồ; tŭ do geh mờr 4 rbô nă cau lơh broă sùm. Pah nam, Dalat Hasfarm tac ai drà kă bro 15 lơgar mờ kơnhoàl ù tiah in, uă ngan là Nhờk, kờp jơh priă lơh geh mờr 60 tơlak dolar Mỹ. Tàm do, Thủ tướng sồr Dalt Hasfarm pơn jat tai rề ơnàng bơcri priă lam lơh uă broă lơh tàm ală tiah bơdìh tiah drà; pơn jat tai sền gròi rài kis phan bơna, nùs nhơm ai cau lơh broă in; pơgồp bơnah bal mờ ƀòn lơgar lơh niam broă lơh gàr niam rài kis mpồl bơtiàn.