VOV4.K’ho- Ngai 03/06, Thủ tướng Cíñ phủ geh Công điện bè broă lơh jat jơnau sồr bè rcang sơndră bơta aniai bơh ơlak, bièr dê. Công điện bơh Thủ tướng Cíñ phủ dê đơs loh, bơh bồ nam tus tŭ do, gơlik geh bàr pe dơ̆ rềs àr gùng lòt gơ lời wơl jơnau kơñ jơ̆ ngan mờ jơnau tờm gơbàn là tài bơh cau lơh tìs ñô ơlak, bièr uă măy rơndeh lòt tàm gùng, tàm hơ̆, geh bàr pe kwang bàng, kông cứk, viên cứk, cau lơh broă lơh broă tàm anih lơh broă dà lơgar dê lơh tìs mờ broă ñô ơlak, bièr măy rơndeh lơh gơbàn rềs àr gùng lòt, pơn rơ ngan là dơ̆ rềs àr gùng lòt gơlik geh tàm mang ngai 02/06/2022 tàm càr Bắc Giang lơh 3 nă cau chơ̆t.

Nàng kờñ kơryan ală dơ̆ rềs àr gùng lòt geh gơrềng tus cau măy rơndeh tìs mờ broă ñô ơlak, bièr tŭ lòt tàm gùng, Thủ tướng Cíñ phủ sồr ală Ƀộ, anih lơh broă ndrờm Ƀộ, anih lơh broă gơwèt Cíñ phủ, Ủy ƀan Mặt trận dà lơgar Việt Nam, ală mpồl cau lơh broă cíñ trị - mpồl bơtiàn, Ủy ƀan Ñân zân ală càr, ƀòn dờng gơwèt dà lơgar mờ ală mpồl lơh broă geh gơrềng sồr lơh jat niam Adat rcang sơndră aniai bơh ơlak, bièr. Sồr kwang bàng, công cứk, viên cứk, cau lơh broă tàm anih lơh broă, kơnòm bơsram, cau bơsram dờng lơh jat niam jơnau sồr bè broă ờ ai ñô ơlak, bièr; lơh krơh lam lài lơh jat niam jơnau sồr neh ñô ơlak, bièr den bañ măy rơndeh; geh broă lơh lơh glài kràñ gơwèt mờ cau dùl nă să is, mpồl cau lơh tìs.

Cau mblàng K’Hạnh