VOV4.K’ho- Mho ngai 12/01, Thủ tướng Cíñ phủ ồng Phạm Minh Chính đơng lam dơ̆ pơrjum mờ ală Ƀộ, ngàñ bè broă lơh rơcăng sơndră sa kwề sa kwà tàm mpồl Cíñ phủ mờ gơnoar ătbồ kơnă hơđơm. Tàm dơ̆ pơrjum, Thủ tướng Cíñ phủ ồng Phạm Minh Chính neh yal loh ală jơnau gam gơkòl mờ ờ hềt pràn jak bơh broă lơh rơcăng sơndră sa kwề sa kwà dê, bè bàr pe ƀộ, anih lơh broă, ală tiah kung gam ờ hềt kràñ cê jơh nùs sơl tàm broă lơh rơcăng sơndră sa kwề sa kwà, lời gơlik geh bàr pe broă lơh tìs pơlai soh ngan bè broă lơh tìs tàm Kông ty Việt Á, halà bàr pe dơ̆ broă geh gơrềng tus jòi cau blơi, cok khà giă ù tàm ală nam rềp ndo.

Bè kơnòl broă nam 2022, Thủ tướng sồr pal lơh jăt nền bơta đơng lam bơh Đảng dê, lơh jăt ngan ngồn Kơrnoăt Pơrjum dờng dê mờ jơnau sồr lơh bơh Mpồl đơng lam dê, ală kơnòl broă mờ Pơrjum Nội cíñ gùt lơgar neh lam lơh gơwèt gơnoar broă, kơnòl broă mờ gơnăp gơnoar bơh Cíñ phủ dê, ală anih lơh broă Cíñ phủ mờ gơnoar ătbồ kơnă hơđơm dê; Sơlơ lùp sền, tơnguh uă kơnòl cau lam bồ dê. Thủ tướng sồr, pơn jăt tai lơh pràn lùp sền, lùp khàu, yal yă, cah rña ală broă lơh tìs geh mpồl bơtiàn sền gròi bè broă lơh tìs tàm Việt Á jăt di jơnau sồr bơh kơrnoăt boh lam dê.

Cau mblàng Lơ Mu K’Yến