Tàm dơ̆ tìp mat cau tĕ khà, Mpồl cau ala mat Quôk hội neh yal cồng nha pơrjum dơ̆ 07, Quôk hội khoă XV mờ bàr, pe broă lơh bơh Mpồl cau ala mat Quôk hội ƀòn dờng Cần Thơ dê tàm pơrjum dơ̆ 7, mờ kung cih dờp ală jơnau đơs, jơnau dan bơh cau tĕ khà dê nàng tơrgùm wơl, yal tus anih lơh broă geh gơnoar ală jơnau đơs, jơnau dan bơh cau tĕ khà dê gơ wèt gơnoar bơsong jat jơnau sồr.

Đơs tàm dơ̆ tìp mat cau tĕ khà, Thủ tướng ồng Phạm Minh Chính neh yal cau tĕ khà in bè cồng nha bơtàu tơnguh lơh sa mpồl bơtiàn bơh dà lơgar dê, ală kơnòl broă, broă lơh tờm tàm tơngai tus. Bal mờ hơ̆, Thủ tướng neh đơs 2, 3 gùng dà ai tơlik lài bơtàu tơnguh Cần Thơ tàm tơngai tus mờ hơ mùl màl ală jơnau lùp bơh cau tĕ khà dê.