VOV4.K’ho- Mho ngai 14/03, Thủ tướng Cíñ phủ ồng Phạm Minh Chính, Kwang ătbồ Mpồl đơng lam dà lơgar bè rơcăng sơndră kòp Kovid-19 neh tus bal dơ̆ bơyai lơh tìp măt, ưn ngài ală cau lơh broă bal dunia neh dong kờl Việt Nam tàm broă rơcăng sơndră kòp Kovid-19 bơh Ƀộ Ngoại giao dê pơgồp bal mờ Anih lơh broă Liên hợp quôk tàm Việt Nam bơyai lơh.

Tàm dơ̆ tìp măt, Thủ tướng Cíñ phủ ồng Phạm Minh Chính pà gĭt, nam 2022, Việt Nam lơh ngan là nam tam dră jai pha mờ kòp bơtờp, rơhời “lơh bè ờs wơl” mờ kòp Kovid-19, dong kờl bơtàu tơnguh wơl mhar, bơtàu tơnguh lơh sa- mpồl bơtiàn kơ̆ kơl jăp, sền gròi ờdo ờdă rài kis mpồl bơtiàn in. Tềng đăp bơta kòp bơtờp yal lài digơlan pơn jăt tai gơbàn kal ke, ờ gơtùi gĭt lài, kal ke ngan yal lài, mờ gùng dà broă lơh pơn jăt tai kơryan lơh bơtờp, bañ lời hat hal ir cau kòp tàm ală hìu sơnơm, Việt Nam gam sơrbac mhar ngan tàm rboă lơh sir broă cit vaccine ding dơ̆ 3 ai cau rlau 18 sơnam in mờ lơh sir broă cit ding dơ̆ bàr ai cau bơh 12 tus 17 sơnam in; rơcăng cĭt ai kơnòm dềt bơh 5 tus 11 sơnam in, kơlôi sơnơng cĭt ding dơ̆ 4 mờ cĭt ai kơnòm dềt hơđơm 5 sơnam in; tơnguh tai bơta pràn jak lơh sơnơm, ngan là pràn jak lơh sơnơm rơcăng lài mờ lơh sơnơm xã; lam lơh jăt geh cồng nha broă lơh jơh ală bơta rơcăng sơndră kòp Kovid-19 dùl bă jak chài.

Cau mblàng Lơ Mu K’Yến