Tàm dơ̆ wă, Thủ tướng Phạm Minh Chính pin dờn dơ̆ lòt còp, lơh broă tàm Hà Nội mờ 2, 3 tiah bơh mpồl dê di tàm dơ̆ tơngkah Ngai tơngklàs càr lơgar Hà Nội (10/10) rơp pơgồp bơnah sơlơ bơt bơtàu ai bơta git gơp niam bơnĕ, lơh krơh niam nàng đòm jat mờ geh dùl ờ geh bàr tàm dunia đah Việt Nam mờ Lào, kung bè bơta git gơp ờs mờng đềt mềr, niam bơnĕ đah càr lơgar Hà Nội mờ càr lơgar Vientiane. Thủ tướng đơs nền, Đảng mờ Dà lơgar Việt Nam sùm lời ai bơta gròi sền uă ngan rlau jơh nàng gàr sùm mờ bơtàu tơnguh bơta git gơp geh dùl ờ geh bàr đah 2 lơgar; sùm tò dong, lơh gơlik bơta ƀuơn ai bơta git gơp lơh broă bal đah 2 càr lơgar Hà Nội mờ Vientiane lơh niam gơnoar broă tềl lam lơh broă bal đah ală tiah bơh 2 lơgar dê.

Thủ tướng sồr 2 càr lơgar bal mờ ală anih lơh broă, ală tiah geh gơ rềng tơrgùm, pơn đơl pràn lơh geh broă tàm tơrbŏ bal đah càr lơgar Vientiane mờ càr lơgar Hà Nội bơh ală gùng rơndeh ntoat mhar lơyah ngan rlau jơh gơtùi, kung bè tàm tơrbŏ bal 2 rài lơh sa, tàm tơrbŏ bal đah Vientiane mờ ală tiah bơh lơgar Lào mờ ală tiah bơh Việt Nam dê bơh ală gùng rơndeh ồs, anih ơhò ơm tàm dà lềng…