VOV4.K’ho- Drim ngai 21/02, tàm Hà Nội, Thủ tướng Cíñ phủ ồng Phạm Minh Chính tus bal mờ geh jơnau đơs kuơmàng tàm Cribơyai mpồl lơh sa kă bro Việt Nam pah nam mờ tơngume “Bơtàu tơnguh wơl mờ bơtàu tơnguh ròt mpồl tac phan tàm tơngai bè ờs pa”. Đơs tàm dơ̆ cribơyai, Thủ tướng Cíñ phủ ồng Phạm Minh Chính đơs nền, nam 2022 là nam geh kuơ dờng màng ngan gơ wèt tus mờ Việt Nam, lơh gơlik bơnàng jă nàng lam lơh jat ală jơnau kờñ, gùng dà ai tơlik lài kuơmàng tus nam 2030.

Việt Nam gam geh tŭ niam bơtàu tơnguh pràn kơldăng ngan jat tàm bơnàng jă bơta pràn tơrgùm bal dà lơgar, geh bơta pràn, bơta ƀuơn, gơnoar broă, bơngă pin dờn dà lơgar tơnơ̆ 35 nam tam gơl pa. Do kung là tŭ nàng lòng nùs nhơm, bơta bơceh pa mờ pràn jak gơ gờp bơh jơh bal Cíñ phủ mờ mpồl lơh sa kă bro dê nàng sơrlèt gan kal ke jat nùs nhơm “bal mờ gơp kong bòl glar kal ke”, bơta kuơ ndrờm bal, bơta aniai tam pà bal”. Tềng đap mat lam lơh geh cồng nha broă lơh bơtàu tơnguh wơl mờ bơtàu tơnguh lơh sa- mpồl bơtiàn, pơgồp bal mờ broă lơh tơrgùm jơh ală bơta rơcang sơndră kòp Kovid-19, tơnguh mhar broă lơh cit sơnơm vaccine.

Cau mblàng K’Duẩn