VOV4.K’ho- Drim ngai 28/4, Thủ tướng Cíñ phủ ồng Phạm Minh Chính tus bal Pơrjum hòi jà bơcri priă càr Sóc Trăng nam 2022 mờ tơngume “Lòt bal- lơh broă bal- bơtàu tơnguh”.

                            Thủ tướng tus bal Pơrjum hòi jà bơcri priă càr Sóc Trăng nam 2022

Tàm pơrjum, kwang đơng lam bồ ală Ƀộ, gah broă lơh neh đơs loh loh rlau tai bè bơta pràn, tŭ niam bơtàu tơnguh bơh càr Sóc Trăng mờ tiah ring dà dờng Cửu Long dê đơs bal. Đơs tàm pơrjum, Thủ tướng Cíñ phủ ồng Phạm Minh Chính tam pà bè 13 broă nàng bơt bơtàu mờ bơtàu tơnguh broă bơcri priă, ală mpồl, ală cau bơcri priă wèt tus jơnau kờñ 12 akhar: “Loh làng, song dơpă, ring bal, ờdo ờdă, geh cồng nha, kơ̆ kơljap”. Tàm pơrjum, càr Sóc Trăng neh jàu kơrnuat bè sră ai gơnoar bơcri priă, sră cơng tàng cih mat bơcri priă ai 4 rơndap broă lơh in mờ kờp jơh priă bơcri cih mat geh rlau 12 rbô tơmàn đông mờ kĭ sră cih kah kơlôi sơnơng lòt sền bơcri priă mờ ală mpồl lơh sa kă bro mờ kờp jơh priă bơcri cih mat rlau 200 rbô tơmàn đông.

Cau mblàng K’Duẩn