Thủ tướng cih dờp, jờng rơ mờ nting bơr gờm chờ ală cồng nha kuơmàng mờ Đảng ƀộ, gơnoar atbồ, ling klàng mờ làng bol càr Hưng Yên neh lơh geh tàm tơngai lài. Thủ tướng đơs loh gơnoar broă bơh rơndap ù tiah dê tàm ai tơlik lài gùng dà ngui geh cồng nha ù tiah, mờ kung geh jơnau sồr, jơnau đơs, kơnòl broă tờm bơh broă lơh rơndap ù tiah dê.

Mờ jơnau kờñ Rơndap ù tiah là tus nam 2030, gơs là càr lơh sa mờ măi mok pa ngan, geh broă lơh sa mờ bồ tơngoh bơtàu tơnguh tàm mpồl lam lài gùt lơgar; tus nam 2050 gơ gơs là ƀòn dờng gơ wèt dà lơgar, ƀòn dờng ngac ngar, pas sơm, niam bơnĕ, gơguh jak. Thủ tướng sồr càr Hưng Yên pal jơh nùs tàm broă lam lơh ngan ngồn rơndap ù tiah. Lam lơh jat niam gùng dà ai tơlik lài bơtàu tơnguh ală gah broă; tơrgùm bơtàu tơnguh lơh sa mờ măi mok pa, măi mok sồ, ồs đèng, năng lượng, kơ khí, lơh gơlik phan, lơh phan sa, phan lơh sơnơm. Bè lơh sa suơn sre, bơtàu tơnguh jat gùng dà brê bơnơm, măi mok pa, kơ̆ kơljap, geh bơta niam.