Tàm dơ̆ lơh broă, Thủ tướng đơs nền, Việt Nam sùm sền Mỹ là dùl tàm ală lơgar lơh broă bal kuơmàng khà dùl, jờng rơ Mỹ tò dong dùl Việt Nam pràn kơldang, lơngăp lơngai is mờ pas sơm. Việt Nam kơp kờñ sơlơ tơnguh bơta git gơp lơh broă bal tơl làm Việt Nam- Mỹ ngai sơlơ ngan ngồn, kơ̆ kơljap, bơtàu tơnguh tàm jơh ală bơta jat bơta ki ngàm lơngăp lơngai is, gơnoar tờm, tơl làm ù tiah mờ rài cíñ trị bơh tơl lơgar dê.

Thủ tướng đơs nền, Việt Nam kờñ blơi phan măi mok, phan bơna mờ phan dong kờl bơh Mỹ nàng tơnguh priă lơh geh bơh kă bro đah Việt Nam mờ Mỹ. Thủ tướng pin dờn, Mpồl duh broă kă bro Mỹ- ASEAN mờ ală mpồl lơh sa kă bro lơgar Mỹ rơp pơgồp bơnah uă ngan sơlơ tơnguh bơta git gơp lơh broă bal tơl làm Việt Nam- Mỹ ngai sơlơ ngan ngồn, bơtàu tơnguh tàm jơh ală bơta jat bơnàng jă geh kuơ bal, cèng wơl bơta gơguh lơh sa mờ broă lơh ai làng bol jơh bal 2 lơgar in, pơgồp bơnah gàr sùm ring lơngai, kơ̆ kơljap, lơh broă bal mờ bơtàu tơnguh tàm tiah do mờ tàm dunia.