VOV4.K’ho- Ngai 12/01, Ủy viên Ƀộ Cíñ trị, Thường trực Ƀan Ƀí thư ồng Võ Văn Thưởng neh còp, pà phan sa tềp bơhiàn yau Ñâm Zần ai hìu bơnhă geh sră dong kờl bơh dà lơgar, cau geh màng mờ dà lơgar tàm càr Bắc Kạn. Tàm kơnhoàl Chợ Đồn, Ủy viên Ƀộ Cíñ trị, Thường trực Ƀan Ƀí thư ồng Võ Văn Thưởng neh lùp còp, pà phan ồng Triệu Văn Vấn kwang bàng lơh broă tơngai lài tam lơh, nam do 97 sơnam ơm tàm thôn Nà Tẳng, xã Lương Bằng mờ jàu pà 200 bơnah phan ai cau geh màng mờ dà lơgar, hìu bơnhă geh sră dong kờl bơh dà lơgar tàm kơnhoàl Chợ Đồn in.

Lơh broă mờ Ƀan Thường vụ Tỉnh ủy Bắc Kạn, Ủy viên Ƀộ Cíñ trị, Thường trực Ƀan Ƀí thư ồng Võ Văn Thưởng đơs niam ală cồng nha mờ càr Bắc Kạn neh lơh geh tàm ală gah lơh sa, mpồl bơtiàn, tơrmù rƀah, gròi sền rài kis làng bol kung bè tàm broă lơh bơt bơtàu Đảng tàm tơngai lài, mờ kung sồr càr Bắc Kạn pơn jat tai tơnguh ală bơta pràn mùl geh tàm bơtàu tơnguh lơh sa- mpồl bơtiàn.

Cau mblàng K’Duẩn