VOV4.K’ho - Tàm bàr ngai bơh ngai 02 tus 03 nhai 08, tàm dơ̆ tus còp mờ lơh broă tàm lơgar Hàn Quốk, Thường trực Ƀan Ƀí thư ồng Võ Văn Thưởng bal mờ Mpồl kwang bàng ala măt dờng màng Đảng Kộng sản Việt Nam neh geh ală broă cri bơyai, tìp mờ ală kwang bàng lơgar Hàn Quốk, tàm hơ̆ geh dơ̆ cri bơyai mờ Củ tịc Quốk hội lơgar Hàn Quốk ồng Kim Jin Pyo, Mpồl đơng lam Đảng at gơnoar broă Bơta pràn Làng bol tàm Quốk hội, Mpồl nghị sĩ git gơ̆p lơh bơyô lơgar Hàn Quốk mờ Việt Nam, Mpồl tìp bal lơh sa bơta chài rơgơi lơgar Hàn Quốk mờ lơgar Việt Nam, Mpồl ală cau lơgar Hàn Quốk kờñ gơboh lơgar Việt Nam.

Tàm dơ̆ cri bơyai mờ Củ tịc Quốk hội ồng Kim Jin Pyo mờ ală anih lơh broă, mpồl lơh broă lơgar Hàn Quốk, ồng Võ Văn Thưởng đơs tờm gùng dà tơnguh git gơ̆p mờ lơgar Hàn Quốk neh geh Tổng Ƀí thư ồng Nguyễn Phú Trọng đơs tàm dơ̆ cri bơyai pờ tơlik tàm internet mờ Kwang atbồ lơgar Hàn Quốk ồng Yoon Suk Yeol; hòi jà Củ tịc Quốk hội ồng Kim Jin Pyo kờñ bal mờ broă bàr gah pơn jăt tai tơnguh broă git gơ̆p cíñ trị bơh broă cri bơyai ală kấp, tơnguh lơh broă lơh sa bal, kă bro mờ bơcri priă bal.

Cau mblàng Ndong Brawl