VOV4.K’ho- Pơn jat tai dơ̆ lòt còp mờ nting bơr sa tềp Đảng ƀộ, gơnoar atbồ mờ làng bol càr Quảng Ngãi, mho ngai 17/01, ồng Võ Văn Thưởng, Thường trựk Ƀan Ƀí thư bal mờ Mpồl kwang bàng dà lơgar neh tus bal chờ hờp mờ broă lơh Sa tềp bơ tòm tơrgùm mat- sơnam pa ring lơngai nam 2022 mờ jàu pà phan sa tềp pà git nđờ rhiăng nă kông ñân tàm Anih lơh sa mờ măi mok VSIP Quảng Ngãi, tàm xã Tịnh Phong, kơnhoàl Sơn Tịnh; tìp mat, nting bơr sa tềp kwang bàng, cau lơh broă Kông ty kổ phần jồr zờu Bình Sơn, anih lơh sa Dung Quất. Sa tềp nam do, Liên đoàn Lao động càr Quảng Ngãi lam lơh uă broă lơh gròi sền sa tềp mờ tơngume “Sa tềp tơrgùm bơtòm mat- sơnam pa ring lơngai nam 2022” mờ jơnau đơs là jơh ală đoàn viên mờ cau lơh broă ndrờm geh sa tềp. Bơh hơ̆, kông đoàn ală kấp neh dong kờl ai mờr 65 rbô nă đoàn viên in mờ khà priă rlau 19 tơmàn đông; hòi jà dong kờl 700 nă đoàn viên, cau lơh broă, đoàn viên Nghiệp đoàn broă lơh ka mờ khà priă 700 tơlak đông, jàu pà 25 nơm hìu ơm kông đoàn mờ khà priă 1 tơmàn đông...

Tus bal chờ hờp tàm broă lơh Sa tềp tơrgùm bơ tòm mat- Sơnam pa ring lơngai nam 2022, Thường trựk Ƀan Ƀí thư ồng Võ Văn Thưởng đơs niam jơnau bơceh bơh Tổng Liên đoàn Lao động Việt Nam dê tàm broă gàr sùm 7 nam tàm pơn jat sùm bơyai lơh sa tềp tơrgùm bơ tòm mat mờ broă lơh ngai sơlơ dờng, dong kờl ngan ngồn, gròi sền rài kis ai cau lơh broă in tàm dơ̆ sa tềp.

Cau mblàng K’Duẩn