VOV4.K’ho - Ngai òr (06/05), tàm càr Bến Tre, Ủy ƀan mpồl bơtiàn Quốk hội pơgồp bal mờ Mpồl kwang bàng Quốk hội càr Bến Tre bơyai lơh pơrjum cri bơyai broă lơh jăt broă dong kờl cau lơh broă, cau ngui cau lơh broă tàm tiah hờ đah jum gơtìp kal ke tài bơh kòp kovid-19.

Gơwèt mờ tiah hờ đah jum dà lơgar, neh geh rơlao 2 tơlăk 500 rơbô nă cau geh màng mờ dà lơgar, hìu rơƀah, hìu ndrờm mờ rơƀah geh dong kờl mờ kờp jơh khà priă rơlao 2 rơbô 660 tơmàn đong. Nam pa do, tài bơh kòp gơtờp pràn, ală càr, ƀòn dờng hờ đah jum dà lơgar kờp jơh khà priă dong kờl ală cau geh uă ngan, geh 78,4% pơn drờm mờ khà priă dong kờl tàm gùt lơgar. Đơs tàm pơrjum cri bơyai, ală kwang bàng đơs là, ală broă dong kờl geh Cíñ phủ tơlik di tŭ, di pal mờ mùl màl tàm rài kis mpồl bơtiàn tàm bơta kòp kovid-19 gơtìp kal ke, neh tam pà kal ke gơwèt mờ làng bol, mpồl lơh sa kă bro, tàm hơ̆ uă ngan là tàm kòp gơtờp dơ̆ 4. Ală tiah tàm tiah hờ đah jum dà lơgar lơh ngan tus jơh nhai 6 nam do geh bơsong jơh ală sră nggal gam gơlời; pơn jăt tai dan geh ală broă dong kờl, ală broă kờñ dong kờl làng bol gơtìp kal ke.

Cau mblàng Ndong Brawl