Nggùl nhai 2 nam 2023, rề ơnàng lùp khàu bơh broă kup rơndeh pơndiang 21 gơl dơm chi tàm tiah Hìu măi pờ tơlik ồs đèng Đăk Pi Hao 2, rềp mờ kơnhoàl Ia Pa, mpồl lơh broă geh gơnoar kơnhoàl Kông Chro, càr Gia Lai git gŏ broă koh kơl 7 tờm chi brê tàm tiểu khu 780 bơnah brê bơh Kông ty TNHH MTV Lâm nghiệp Ia Pa atbồ. Pơn jat hơ̆, anih lơh broă geh gơnoar git gŏ dơ̆ mus kơl brê tàm tiểu khu 792 gơ wèt bơnah brê atbồ bơh Kông ty TNHH MTV Lâm nghiệp Kông Hde dê. Tàm tiah gơlik geh bơta mus kơl chi brê, git nđờ rhiang tờm chi Bằng lang, căm xe, ntìng ka gơtìp òt pừ, jơh ală khà dơm chi neh geh cèng lik bơh brê. Mblàng lơh loh jơnau ñchi bơh tài lơyài git gŏ, kơryan broă mus kơl brê, ồng Lê Văn Thủy- Kwang atbồ Kông ty TNHH MTV Lâm nghiệp Kông Hde dờp geh bơta ờ gròi sền: “Pơlam loh làng tus kwang bàng là geh broă lơi den yal mờ kwang đơng lam bồ kông ty nàng bơsong mờ yal kâp hơ đang in. Mơya uă tŭ, kwang bàng, cau lơh broă sơnơng là làng bol tàm ƀòn lơgar ai dơm chi lơh hìu den tàng kung ờ gròi sền”.

Bơta brê gơtìp mus kơl kung gơlik geh tàm uă tiah ndai tàm càr Gia Lai bè Kbang, Chư Prông, Chư Sê… Lồi nhai 2 nam 2023, mpồl lơh broă geh gơnoar kơnhoàl Kbang lòt sền, git gŏ tàm tiểu khu 114, bơnah brê atbồ bơh Kông ty TNHH MTV Lâm nghiệp Sơ Pai dê geh 16 tờm chi brê ơnàng bơh 40 tus 90 phơng gơtìp òt pừ. Ồng Nguyễn Văn Hợi- Kwang atbồ Kông ty TNHH MTV Lâm nghiệp Sơ Pai, kơnhoàl Kbang đơs: “Broă lơh atbồ, sền gàr brê tàm ală nam rềp ndo gơtìp uă ngan kal ke. Mpồl sền gàr brê lơh broă sùm ờ gơtùi jòi tơl cau lơh broă. Làng bol kờñ pès, mùss wơl ală bă brê mờ kông ty sền gàr, tŭ do neh là brê pa hòn. Làng bol mus pès tàm bă brê, lơh kòl yan kông ty in, geh ală tờm chi ờ geh bơta kuơ ngui mơya ală bol mus kơl kung gam òt nàng gơ gơs tiah geh broă lơh tìs uă”.

Kuơmàng, bồ nhai 3 nam 2023, mpồl kwang àng càr Kon Tum neh git gŏ khà uă ngan dơm chi tìs mờ adat boh lam tàm ƀlàng prap bràs kềng gah dà dờng Đăk Pxi, gơ wèt xã Đăk Pxi, kơnhoàl Đăk Hà. Tiah tơnhàu bràs, lŭ rơđeh do là bơh Kông ty TNHH 87 dê. Tàm khà dơm chi tìs mờ adat boh lam geh mpồl kwang àng git gŏ, geh 2 pang mpàn dờng, 4 hộp dơm chi, 11 gơl dơm chi wil geh tềl tơnggŏ pa òt mờ 5 tờm chi geh tềl tơnggŏ neh tram jŏ ngai tàm dà. Jơh khà dơm chi gơtìp git gŏ ndrờm jòng mờ dờng ngan. Nàng mpồn mat mpồl lơh broă geh gơnoar, bol blơ̆ neh prap pồn dơm chi mờ broă bồr bràs bơh hơđang. Bulah bè hơ̆, geh 2, 3 dơm chi geh tềl tơnggŏ pa koh kơl bơh brê, bol blơ̆ tràl sơbil lời tàm ƀlàng prap bràs halà tài ờ hềt thàn mpồn, pơndiang.

Bơta pal sền gròi là bă tiah ƀlàng prap bràs mpồn dơm chi tìs adat boh lam mìng ngài anih lơh broă Ủy ƀan Ñân zân xã mờr rlau 1 kơi sồ lơm, mơya gơnoar atbồ tàm ƀòn lơgar den ờ git. Ồng Trần Phước Tuấn, Củ tịc Ủy ƀan Ñân zân xã Đăk Pxi đơs nền: lài mờ tŭ tơngai mpồl kwang àng git gŏ tiah prap pồn dơm chi tìs adat boh lam, gơnoar atbồ xã sùm bơyai lơh lòt sền, jòi kup mờ broă lơh atbồ, sền gàr brê kơ̆ kơljap ờ geh broă lơi gơlik geh: “Xã kung neh lơh ală Mpồl làm gah sùm lòt sền, jòi kup, atbồ, sền gàr brê kung bè lơh 2 anih gròi sền tàm 2 gơl gùng tờm là gùng càr 677 mờ gùng pleh dà kŏ dà cò. Tơngai pa do den broă lơh atbồ, sền gàr geh lơh kơ̆ kơljap”.

Bơdìh mờ khà dơm chi mờ mpồl lơh broă geh gơnoar git gŏ tàm ƀlàng prap bràs bơh Kông ty TNHH 87 dê kềng gah dà dờng Đăk Pxi, gơ wèt xã Đăk Pxi, kơnhoàl Đăk Hà, gam geh dơm chi dờng ngan geh git gŏ tàm suơn kau su ngài mờ hơ̆ mờr 300 thơk, mờ 2 anih tơrgùm pồn dơm chi. Tàm anih pồn dơ̆ 1 geh 7 hộp dơm chi dờng. Tàm anih pồn dơ̆ 2 geh 4 hộp dơm chi dờng, dềt krơi is. Jat 2, 3 jơnau tơnggit, khà dơm chi tàm suơn kau su là bơh bol blơ̆ pơndiang lik bơh anih pồn dơm chi tìs mờ adat boh lam tàm ƀlàng prap bràs bơh Kông ty TNHH 87 kềng gah dà dờng Đăk Pxi.

Tŭ đơs tus khà dơm chi tìs mờ adat boh lam gơtìp mpồl lơh broă geh gơnoar kup bàn, dùl nă kwang đơng lam bồ Ci kụk kiểm lâm càr Kon Tum kung đơs tus khà dơm chi geh 6 hộp, 11 gơl dơm chi wil geh tềl tơnggŏ pa koh kơl mờ 5 dơm chi geh tềl tơnggŏ neh tram jŏ ngai tàm dà tàm ƀlàng prap bràs mờ ờ đơs tus khà dơm chi bol blơ̆ pồn tàm suơn kau su. Kwang đơng lam bồ do kung pà git, tŭ do broă do gam geh Mpồl kwang àng pơn jat tai lùp khàu lơh loh, đah mpồl kiểm lâm mìng geh kơnòl pơgồp bal den tàng ờ geh jơnau tơnggit mùl màl bè khà mờ bơta dơm chi kup bàn.

Rề ơnàng lùp khàu, mpồl lơh broă geh gơnoar càr Kon Tum bơh sơn rờp neh git gŏ tàm Tiểu khu 327, xã Đăk Pxi geh 22 tờm chi gơtìp koh kơl. Bulah bè hơ̆, ờ hềt gơtùi git khà dơm chi gơtìp koh kơl tàm brê mờ khà dơm chi pồn tàm ƀlàng prap bràs geh gơ rềng bal halà ờ. Broă do gam geh mpồl lơh broă geh gơnoar càr Kon Tum pơn jat tai lùp khàu lơh loh.